Ռազմական հոգեբան Դավիթ Ջամալյանն այսօր լրագրողների հետ հանդիպման ժամանակ խոսեց արցախցի 14-ամյա աղջկա` Ադելինայի՝ Ադրբեջանի նախագահ Իլհամ Ալիևին վերջերս հղած նամակի վերաբերյալ:
Նա նշեց, որ այն, ինչ գրել էր 14-ամյա աղջիկը, մեր բոլորի մտահոգությունն է, բոլորս էլ ուզում ենք խաղաղ ապրել: Սակայն այլ խնդիր է Բաքվի պատասխանն այդ նամակին: Հոգեբանը նշեց, որ Բաքվի պատասխանում առկա է ակնհայտ քարոզչություն:
Դավիթ Ջամալյանն ասաց, որ ադրբեջանական քարոզչությունն այսօր ստեղծել է ադրբեջանական հայի կերպար. «Թեև հայատյացությունը շարունակվում է, բայց զուգահեռաբար ադրբեջանական հայի կերպարի նկատմամբ հանդուրժողականություն է քարոզվում՝որպես լավ հայեր: Այս պահին նրանք երկու այդպիսի հայեր են հայտնաբերել` Գեորգի Վանյանը, ով ադրբեջանական քարոզչության աստղերից մեկն է և Բալայև ազգանունով փախստականներից մեկը»:
Ջամալյանը նկատեց, որ Ադելինային ևս վերագրել են ադրբեջանական հայի կերպարը, և դա երևում է պատասխան նամակից: Սակայն, ըստ հոգեբանի, Ադելինայի պարագայում ադրբեջանական քարոզչությանը չի հաջողվի ստեղծել այդ կերպարը, քանզի աղջիկն ազատ ու արժանապատիվ արցախահայության նոր սերնդի ներկայացուցիչ է, որին հնարավոր չէ համոզել վերադառնալ Ադրբեջանի կազմ:
Դավիթ Ջամալյանի կարծիքով՝ հայկական կողմը պետք է ի նկատի ունենա, որ առաջիկայում Ադրբեջանը նաև նման քարոզչության ուղղությամբ է աշխատելու. «Մենք պետք է ուղղակի ուշադիր լինենք նման հարցերի նկատմամբ և օպերատիվ արձագանքենք դրանց»: