Լարսի ճանապարհը, որը շուրջ մեկ շաբաթ բաց էր բոլոր տեսակի մեքենաների համար, երեկ երեկոյան դարձյալ փակվել է:
Ռուսաստանում Հայաստանի դեսպանատան մաքսային կցորդ Արամ Թանանյանը «Առաջին լրատվական»-ի հետ զրույցում նշեց. «Վերջին մեկ շաբաթում Լարսի ճանապարհը բաց էր և ամեն օր 500-550 մեքենա դուրս էին գալիս Ռուսաստանից: Դրա շնորհիվ մի քիչ հերթը պակասեց, բայց իհարկե, նորից ավելանում են: Երեկ երեկոյան դարձյալ ճանապարհը փակվեց, Խաչի լեռնանցքում ուժեղ ձյուն ու քամի սկսվեց, որի հետևանքով Ռուսաստանից մեքենաներ դուրս չեն գալիս: Վրաստանից շարունակում են դեպի Ռուսաստան մեքենաներ գալ, որոնք արդեն անցել են Խաչի լեռնանցքը: Օսեթիայի տարածքում արդեն մոտ 1500 մեքենա կա, բայց եղանակը կայունացավ, և հույս ունեմ, որ մոտակա ժամերին ճանապարհը կմաքրեն և գոնե մի քանի ժամ մեքենաները կանցնեն: Դա Վրաստանից է կախված»:
Նրա խոսքով, միայն Օսեթիայի տարածքում կուտակված է 1500-ից ավելի մեքենա, բայց կուտակված մեքենաներ կան նաև Կաբարդինո-Բալկարիայի և տարբեր այլ հանգույցներում. «Բացի այդ, մի մասը չեն գալիս՝ իմանալով, որ այս պահին Լարսը փակ է: Մարդատար մեքենաներ հիմա չեն երևում, հավանաբար, Վրաստանը տոն օրերի հետ կապված թույլ է տվել, որ մարդատարները շուրջօրյա մտնեն Վրաստան: Առաջնահերթ սպասարկում են մարդատար մեքենաները, դրանք մեծ խոչընդոտներ են ստեղծում բեռնատարների համար: Տոնական օրերին օրական մինչև 500 մեքենա մտնում էր Վրաստան: Քանի որ ձյուն է եկել, մարդատարները չկան: Բայց հենց եղանակը բացվի, միանգամից գալու են և իրենք առաջնահերթ անցնելու, այսինքն դարձյալ բեռնատարները սպասելու են:
Նախատոնական օրերին գիշերը բացառապես բեռնատարներն էին անցնում, մարդատարներին չէր թույլատրվում: Հավանաբար, քանի որ տուրիստական մեծ հոսք է եղել, Վրաստանը թույլ է տվել գիշերն էլ մտնել իր երկիր և դա բերել է նման խոչընդոտների»:
Դիտարկմանը, թե հիմա շատ է խոսվում այլընտրանքային ճանապարհների մասին, ե՞րբ Լարսի խնդիրը լուծված կարող ենք համարել, Թանանյանը պատասխանեց. «Լարսից, որպես այդպիսի խնդիր չկա, հիմնական պրոբլեմը եղանակի հետ կապված Վրաստանի տարածքում է, Խաչի լեռնանցքը, որը բավական բարձր է, որով անցնում է ճանապարհը: Այս պահին էլ Լարսի անցակետը ընդարձակում, ընդլայնում են, որպեսզի ավելի մեծ թվով մեքենաներ բաց թողնեն: Այսինքն հիմնական խնդիրը, որ մեքենաները կուտակվում են, Վրաստանի տարածքում եղանակային պայմաններն են: Լարսը կբարեկարգեն և մոտ 1 տարի հետո այն բոց կթողնի այսօրվա իր հնարավորություններից եռակի անգամ ավելի: Բայց եթե Վրաստանի տարածքում եղանակային հարցեր լինեն, դարձյալ էլի ոչինչ չեն կարող անել: Այս պահին էլ կանգնած ենք եղանակի հետ կապված խնդրի առջև»: