Ադրբեջանական Trend լրատվական գործակալության փոխանցմամբ՝ ակնկալվում է, որ մոտ ժամանակներս Ղազախստան կայցելի Թուրքիայի վարչապետ Ռեջեփ Թայիփ Էրդողանը։
Էրդողանի առաջիկա ղազախական այցը Ստամբուլում դարձել է Ղազախստանի արտգործնախարար Երժան Կազիխանովի քննարկման հիմնական թեմաներից մեկը։ Կազիխանովը Ստամբուլում մասնակցում էր Իսլամական համագործակցության կազմակերպության (ԻՀԿ, նախկին ԻԿԿ) արտակարգ նիստին, որը նվիրված էր Սոմալիում տիրող իրավիճակին։
Էրդողանի հետ հանդիպման ժամանակ Կազիխանովը դիտարկել է Թուրքիայի վարչապետի առաջիկա ղազախական այցի նախապատրաստմանն առնչվող խնդիրները։ Քննարկվել են նաև թուրք-ղազախական երկկողմանի համագործակցության ուղղվածության հեռանկարները։
Հանդիպման ժամանակ Էրդողանը հայտարարել է, որ Ղազախստանը կենտրոնաասիական տարածաշրջանում Անկարայի ռազմավարական գործընկերն է։
Հիշեցնենք, որ ավելի վաղ նշվում էր, թե երկկողմանի հարաբերությունների զարգացման համար Էրդողանը Ղազախստան է մեկնելու սեպտեմբերին։ Թուրքիան ու Ղազախստանը ներկայումս մտադիր են երկու երկրների միջև ապրանքաշրջանառությունը հասցնել մինչև 10 միլիարդ դոլարի։
Ի դեպ, հոկտեմբերին էլ Ղազախստան է մեկնելու Թուրքիայի նախագահ Աբդուլլահ Գյուլը՝ մասնակցելու թյուրքալեզու երկրների նախագահների գագաթնաժողովին։