Արցախի Հանրապետության նախագահ Արայիկ Հարությունյանը դեկտեմբերի 17-ին առանձին հանդիպումներ է ունեցել ԱՀ Ազգային ժողովի «Արցախի ժողովրդավարական կուսակցություն», «Միասնական Հայրենիք» և «Ազատ Հայրենիք – ՔՄԴ» խմբակցությունների ներկայացուցիչների հետ՝ իր կողմից դեկտեմբերի 10-ին հայտարարված՝ պետության առջև ծառացած հիմնախնդիրների լուծման գործում քաղաքական համագործակցության առաջարկի շրջանակներում:
Այսօր էլ նույն շրջանակներում հանդիպում է ունեցել Արցախի ԱԺ «Արդարություն» և ՀՅԴ խմբակցությունների հետ:
Այս առնչությամբ Արցախի ԱԺ արտաքին հարաբերությունների հանձնաժողովի նախագահ, ՀՅԴ խմբակցության ղեկավար Վահրամ Բալայանը «Առաջին լրատվական»-ի հետ զրույցում նշեց, որ այս նախաձեռնությունը երկրի իշխանություններից է եկել. «Նման բան եղել է նաև նախորդ իշխանությունների ժամանակ, երբ տարբեր ուժերի կողմից ներկայացվել են առաջարկություններ: Օրինակ, մենք շուրջ 50 գրավոր առաջարկներ ենք ներկայացրել, քննարկել ենք դրանք իրականացնելու հնարավորությունները: Այդ հանդիպումներում քննարկում ենք նաև ներքին ու արտաքին քաղաքականությունների հետ կապված օրախնդիր հարցերը»:
Հարցին, թե արդյոք Արցախի նախագահ Արայիկ Հարությունյանը պատրաստակամություն հայտնե՞լ է քննարկել այդ 50 առաջարկները, ընդունել դրանք, Բալայանը պատասխանեց. «Իհարկե, այդ գրավոր առաջարկների մի մասը բավարարվել է, բայց նաև շատ հարցեր կան, որոնք դեռևս քննարկման անհրաժեշտություն ունեն: Ինչ վերաբերում է տարաձայնություններին, ապա մեր հիմնական պահանջը անվտանգային համակարգի ստեղծումն է: Այն պատկերացումները, որ մենք ունենք բանակի, պաշտպանության, քաղաքացիական պաշտպանության, ընդհանրապես սահմանամերձ գյուղերի հետ կապված, դրանք են, որ մեզ համար անչափ կարևոր են և Արցախի կարգավիճակի հետ կապված հարցերը: Այդ հարցերն են, որ քննարկում ենք: Իհարկե, ամեն բան չէ, որ լրագրողներին փոխանցվում է, բայց հարցեր կան, որոնց մանրամասներն ենք քննարկում»:
Արցախի ԱԺ «Միասնական հայրենիք» խմբակցության պատգամավոր, ԱԺ պաշտպանության, անվտանգության և օրինապահպանության հարցերի հանձնաժողովի նախագահ Սեյրան Հայրապետյանն էլ «Առաջին լրատվական»-ի հետ զրույցում նշեց, որ այդ հանդիպումներում արտառոց ոչինչ չկա, դրանք հաճախակի են լինում. «Ճիշտն ասած, նմանատիպ հանդիպումները հաճախակի բնույթի են կրում, կոնկրետ հանդիպման ծրագիրը բյուջեի մասին չէ, այլ քաղաքական զարգացումների, Եվրոպայում հանդիպումների, Սոչիում հանդիպումներրի, ինչպես նաև երկրի առջև ծառացած խնդիրների վերբերյալ: Մեր խմբակցության հետ նման հարցեր են քննարկվել, ներկայացրել ենք մեր տեսակետները, մտահոգությունները, ինքն իր ունեցած ինֆորմացիան է ներկայացրել: Հասկանալի է, որ քննարկել ենք նաև Արցախի Հանրապետության առջև ծառացած խնդիրները, սոցիալական, անվտանգային հարցերը, երկրի ներկայի ու ապագայի մասին ենք խոսել»,-ասաց նա:
