Այսօր տեղի է ունեցել ԵՊՀ հոգաբարձուների խորհրդի փակ նիստը, քվեակության արդյունքներով` 19 կողմ, 5 դեմ ձայներով 5 տարի ժամկետով ԵՊՀ ռեկտոր է ընտրվել Հովհաննես Հովհաննիսյանը։ «Քանի որ թեկնածուն ես էի, ինձ ընտրել են ռեկտոր-կառավարիչ։ Ժամանակին, երբ խոսք էր գնում ու ասում էին՝ դուք հավակնում եք այս պաշտոնին, ասում էի, որ այս պահին նման պլան չկա։ Դա եղել է երկու տարի առաջ, հետագայում մարդկանց պլանները կարող են փոխվել։ Շատ բաներ փոխվեցին, և ես գտա անհրաժեշտությունը, որ պետք է գամ ԵՊՀ։ Եվ ես կարծում եմ՝ այս 4 ամսվա ընթացքում ես ապացուցել եմ հօգուտ ԵՊՀ-ի, պրոֆեսորադասախոսական անձնակազմի և ուսանողության, որ իմ այստեղ լինելը բավականին բարձրացնելու է ԵՊՀ-ի վարկը և հեղինակությունը։ Եվ այդ մասին են վկայում տարբեր աշխատակիցներ»,- լրագրողներին ասաց Հովհաննես Հովհաննիսյանը։
