Հայաստանի ու Ադրբեջանի առաջնորդներին հաջողվել է երեկ Բրյուսելում համաձայնության հասնել երկաթգծի, բայց ոչ՝ ավտոմոբիլային հաղորդակցությունը բացելու հարցում, որը փաստացի վիճահարույց գլխավոր հարցերից մեկն էր։ Այդ մասին հայտարարել է Եվրոպական խորհրդի ղեկավար Շառլ Միշելը՝ կողմերի միջև երեկ ավելի քան չորս ժամ շարունակված բանակցություններից հետո։
Ամփոփելով կեսգիշերն անց ավարտված բանակցությունները՝ եվրոպացի բարձրաստիճան դիվանագետը պնդել է՝ հարցերը բարդ էին, քննարկումը՝ բաց և անկեղծ․ «Միասին մենք ցույց տվեցինք, որ ուղիղ բանակցությունները օգտակար են և անհրաժեշտ նույնիսկ բարդ թեմաների շուրջ: Իհարկե կան բարդ հարցեր, բարդ թեմաներ, սակայն առաջին քայլերը, եթե մենք ուզում ենք հասնել առաջընթացին, դա, անշուշտ, միմիանց լսելն է, հասկանալն է՝ ինչ տարբեր կարծիքներ, տեսակետներ կան, երբեմն հստակեցնել տարբեր փաստարկները», – ասել է Շառլ Միշելը:
Ռուսաստանցի քաղաքագետ Ստանիսլավ Տարասովն «Առաջին լրատվական»-ի հետ զրույցում դրական գնահատեց հանդիպման փաստը։ Նշեց, որ դա շարունակությունն է այն երկխոսության, որը սկսել է ՌԴ նախագահ Վլադիմիր Պուտինը Սոչիում․ «Հիմա եվրոպացիներն իրենց վրա նախաձեռնողականություն վերցրեցին, ինչը միանշանակ դրական է։ Սա ցույց է տալիս, որ այն բանից հետո, երբ կայացավ 3+2 ֆորմատով առաջին հանդիպումը, որին ներկա էին մասնակից երկրների փոխարտգործնախարարները, դրական առաջընթաց է եղել։ Գիտեք, որ այդ հանդիպմանը հաջորդեց Թուրքիայի արտգործնախարար Չավուշօղլուի հայտարարությունն առ այն, որ Անկարան պատրաստ է երկկողմ հարաբերությունների բարելավմանը։ Այսինքն՝ ամեն բան դրական հունով է զարգանում։ Եվ ընդհանրապես այս ամենը համապատասխանում է 2020 թվականի նոյեմբերի 9-ի եռակողմ համաձայնագրի ոգուն, որտեղ նշվում է տարածաշրջանային կոմունիկացիաների ապաշրջափակման անհրաժեշտությունը։ իսկ դրա համար կողմերի միջև նախևառաջ դրական մթնոլորտ պետք է ձևավորվի։ Հիմա ամեն ինչ այդ սցենարով է ընթանում»,- նկատեց մեր զրուցակիցը։
Միևնույն ժամանակ Ստանիսլավ Տարասովն անդրադարձավ այն հանգամանքին, որ ո՛չ Սոչիում և ոչ էլ Բրյուսելում չքննարկվեց Ղարաբաղի կարգավիճակի հարցը։ Ռուս վերլուծաբանի կարծիքով՝ դա ավելի շատ ԵԱՀԿ Մինսկի խմբի կոմպետենտության շրջանակներում քննարկվող հարց է․ «Հիմա կարող ենք արձանագրել, որ չնայած տարբեր արձագանքների՝ Մինսկի խումբն արդեն սկսել է իր աշխատանքը։ Արձանագրենք, որ Ադրբեջան իր մասնակցությունն այդ ֆորմատում չի տեսնում՝ նշելով, որ որևէ տարբերակով Արցախի կարգավիճակի հարց քննարկել չի ցանկանում և նման հարց գոյություն չունի։ Ահա և ամբողջ խնդիրը»։
Տարասովի դիտարկմամբ՝ այն, որ նման հանդիպումներ են տեղի ունենում, հույս է ներշնչում, որ ռազմական գործողությունների հավանականությունը կնվազի․«Առաջին հերթին ես կուզեի անդրադառնալ Հայաստանի ղեկավարության դիրքորոշմանը, վարքագծին։ Գիտեք, որ Հայաստանի կառավարությունն իր ծրագրում նշել է, ապա նաև պաշտոնական Երևանը հայտարարել է, որ պատրաստ է առանց նախապայմանների Թուրքիայի հետ հարաբերությունները կարգավորել։ Ղարաբաղյան պատերազմից հետո Հայաստանի ղեկավարությունն իրեն դրսևորվում է այնպես, ինչպես կդրսևորեր ցանկացած պարտված կողմ ու ես սա ճիշտ եմ համարում»,-եզրափակեց մեր զրուցակիցը։
