Թուրքական Hürriyet թերթի փոխանցմամբ՝ Դիարբեքիրում տեղակայված Թուրքիայի ռազմաօդային ուժերի 2-րդ հրամանատարության F-16 մարտական ինքնաթիռները F-104-երի աջակցությամբ ավիահարվածներ են հասցրել Հյուսիսային Իրաքին, ուր գտնվում են Թուրքիայում ահաբեկչական հռչակված ու արգելված «Քրդստանի աշխատավորական» կուսակցության (PKK) ճամբարները։
Նշվում է, որ ռմբակոծության են ենթարկվել Ղանդիլի լեռնաշղթայում ու հարակից շրջաններում գտնվող PKK 4 տարբեր ճամբարներ, որոնցում թուրքական կողմի հաշվարկներով պետք է գտնված լինեն PKK-ի առաջնորդներ Մուրադ Քարայըլանը, Ջեմիլ Բայըքը, Դուրան Քալքանը։
Տեղական ժամանակով ժամը 21.00-ին մեկնարկած թուրքական օդային օպերացիան ավարտվել է ժամը 23.30-ին, ինչից հետո թուրքական ինքնաթիռները վերադարձել են իրենց բազաները։ Ընդհանուր առմամբ, այդ գործողությանը մասնակցել է 15 մարտական ինքնաթիռ։
Հիշեցնենք, որ Թուրքիան նախկինում էլ բազմիցս ավիահարվածներ է հասցրել Հյուսիսային Իրաքում գտնվող PKK-ի ճամբարներին՝ մի շարք դեպքերում անգամ իրականացնելով ցամաքային խոշոր արշավներ, որոնք վերջին հաշվով նրան ոչինչ չեն տվել, և ամեն անգամ Հյուսիսային Իրաքից թուրքական բանակի «հպարտորեն» նահանջը PKK-ն դիտել է որպես իր հաղթանակ։
Տեսանյութ.