Օրեր առաջ կառավարությունը որոշում ընդունեց, որ էլեկտրոմոբիլների ներմուծումից ԱԱՀ-ը չի գանձվի մինչև 2024 թիվը, սակայն սահուն շրջանցվեց այն, որ ԵԱՏՄ գերակա օրենքով 2022-ի հունվարի 1-ից էլեկտրոմոբիլների ներմուծումից կգանձվի հօգուտ ԵԱՏՄ բյուջեի 15% մաքսատուրք: Դա նշանակում է լուրջ խոչընդոտ բնակչության համար էլ. մեքենա գնելու համար: Սա այն պայմաններում, երբ Հայաստանում մեծ թափ է ստանում էլ.մեքենաների գնումը բնակչության կողմից: Ընդ որում, Բելառուսը այս տարի դիմել էր ԵԱՏՄ երկրներին, որ մաքսատուրքը ևս մի քանի տարի չսահմանվի, սակայն ԵԱՏՄ անդամներից, այդ թվում՝ Հայաստանից որևէ արձագանք չի եղել, ուստի այս պահի դրությամբ 2022թ. հունվարի 1-ից էլեկտրոմոբիլներից գանձվելու է 15% մաքսատուրք: Մինչդեռ Հայաստանը ամենաշահագրգռված կողմը պետք է լիներ՝ հաշվի առնելով խիստ կախվածություն ունի նավթից ու գազից՝ ի տարբերություն Ռուսաստանի, Ղազախստանի:
Տնտեսագետ Հրանտ Միքայելյանի դիտարկմամբ՝ 2022թվականի հունվարի 1-ից նախատեսվող այդ փոփոխությունը միտված են հիմնականում նրան, որ շատ հարկ մուծվի և նպաստի այդ ծառայությունների՝ մասնավորապես ՏՏ ոլորտի զարգացմանը, վերջինիս որակի բարձրացմանը: «Չեմ կարծում դա զգալի ազդեցություն կունեա ընդհանուր շուկայի, ներկրման չափերի վրա: Էլեկտրոմոբիլ ձեռքբերել ցանկացողներին չեմ կարծում խոչընդոտ լինի սահմանված մաքսատուրքը»,-առանձնացրեց մեր զրուցակիցը։
Հարցին,թե ինչու հայկական կողմը չի փորձել հրաժարվել կամ խուսափել մեզ ոչ ձեռնտու պայմաններից, Միքայելյանն ասաց, որ հաստատապես չգիտի հանգամանքների մասին, բայց պետք է հաշվի առնել, որ մենք մի անգամ արդեն հետաձգել ենք այդ հավելյալ մաքսատուրքի սահմանումը: Նշանակում է՝պայմանները ավելի վաղ պետք է ընդունվեին, բայց մեր ցանկությամբ՝ հետաձգվել է մինչև 2022թվականը: Մյուս կողմից, ըստ տնտեսագետի, մեզանում էլեկտրոմոբիլների ներկրման աճի համար անհրաժեշտ պահանջարկը չի կարող դեռ շոշափելի լինել, քանի որ դրա համար անհրաժեշտ է լիցքավորման կայանների ավելացում բավարար քանակով:
Ինչ վերաբերում է գազից կախվածությանը, հարկ եմ համարում նշել, որ, այնուամենայնիվ, ընդհանուր գազի և նավթի շուկայի շնորհիվ մենք հնարավորություն ունենք որոշակիորեն կայուն վիճակում պահպանել նավթի, գազի գները:
