«Առաջին լրատվական»-ի զրուցակիցն է միջազգային իրավունքի մասնագետ Արա Խզմալյանը։
-Պարոն Խզմալյան, սահմանային վերջին ագրեսիայի ֆոնին տեսակետներ են հնչում, թե իմաստ չունի դիմել միջազգային կառույցներին, քանի որ սահմանների դեմարկացիա ու դելիմիտացիա արված չէ։ Այս մոտեցումն ինչքանո՞վ է հիմնավոր։
–Նման բան ասելն անհեթեթություն է։ Միջազգային իրավունքում արգելված է տարածքային վեճերի շրջանակներում ուժի գործադրումը։ Այսինքն՝ նույնիսկ եթե տարածքն օկուպացված է տվյալ պետության կողմից, այդ դեպքում ևս մյուս պետության կողմից ուժի գործադրումը արգելված է։ Առավել ևս՝ վիճելի տարածքներում ուժի գործադրումն արգելված է, ուստի անհեթեթ է ասել, որ այդ վիճելիության պայմաններում կողմերից մեկը ուժ գործադրել ու մյուս կողմի զինված ուժերի դեմ որևէ գործողություն իրականացնել։ Ուստի միանշանակ կարող ենք դիմել ՄԱԿ- ի Անվտանգության խորհուրդ։ Եթե խոսում ենք նոյեմբերյան սրացումների մասին, ապա որևէ վերաբերելի քարտեզագրման պարագայում՝ խոսքը նաև թե՛ առաջին հանրապետության և թե ԽՍՀՄ տարիներին եղած քարտեզների մասին է, քարտեզագրման որևէ շրջանակներում այդ տարածքը չի համարվել Ադրբեջանի մաս, եղել է ՀՀ տարածք։
-Այսինքն՝ ցանկացած պարագայում մեր կողմից ՄԱԿ-ի Անվտանգության խորհուրդ դիմելն արդարացված կլինի։
-Այո։ Աշխարհի սահմանների զգալի մասը դեմարկացված ու դելիմիտացված չէ։ Բայց դա երբեք չի խանգարել ագրեսիայի դեմ որևէ քայլ գործադրել։ Տվյալ դեպքում մենք գործ ունենք ագրեսիայի հետ։
-Նման կոչերը, փաստորեն ավելի շատ քաղաքական շահարկումների դաշտից են։
-Ես չէի ցանկանա մեկնաբանել, թե դա ինչ շահարկում է։ Կարող եմ ասել, որ դա շահարկում է և անհիմն է։ Իսկ թե ինչ մոտիվացիաներ կան՝ չէի ցանկանա մեկնաբանել։
