Իրանի հարավում սկսվել են «Զոլֆագար 1400» զորավարժությունները:
Դրանք անցկացվում են ռազմածովային ուժերի, հակաօդային պաշտպանության, ռազմաօդային ուժերի և ցամաքային զորքերի ստորաբաժանումների մասնակցությամբ։
«Զոլֆագար 1400» զորավարժությունների ուղերձը խաղաղություն և բարեկամություն հաստատելու պատրաստակամությունն է՝ հենվելով սեփական հնարավորությունների վրա։
Իրանագետ, ՄԱՀՀԻ ասոցացված փորձագետ Էմմա Բեգիջանյանի կարծիքով՝ Ադրբեջանի ու Իրանի միջև առկա լարվածությունը, ինչպես և ինքը նախկինում կանխատեսել էր՝ գնում է դեպի մարում․«Բայց ԶԼՄ-ներում դեռևս փոխադարձ «գնդակոծումները» շարունակվում են։ Նման զորավարժությունները կարող են ուղերձ պարունակել, որովհետև շատ փորձագետներ՝ անգամ արտերկրում, գտնում են, որ սահմանամերձ շրջաններում եղած զորավարժությունները ճիշտ էին և էֆեկտիվ։ Հնարավոր է՝ դա ինչ-որ կերպ նպաստել է Ալիևի «նահանջին», ուստի սա ևս չի կարող հենց այնպես լինել»-«Առաջին լրատվական»-ի հետ զրույցում ասաց նա;
Բեգիջանյանի դիտարկմամբ՝ Իրանն առաջ է շարժվում ելնելով իր ազգային շահերից և քանի որ ազգային անվտանգության ոլորտում մեր շահերը համընկնում են, ուրեմն այս զորավարժությունները ևս Հայաստանի շահերին նպաստող քայլ է․ «Եթե դա արվում է թուրքերի ծավալապաշտական ախորժակները զսպելու համար՝ նշանակում է, դրանք համապատասխանում են նաև Հայաստանի շահերին»։
Մեր զրուցակցի խոսքերով՝ Իրան-Ադրբեջան հարաբերություններն ի սկզբանե, անկախությունից ի վեր միշտ եղել են մեծ ելևէջներով, իսկ այս անգամ՝ ավելի լուրջ բնույթ էին լրում, հատկապես թուրք-ադրբեջանական տանդեմի պատճառով․ «Ավելի կոնկրետ կասեի՝ թուրքերի պատճառով, որովհետև Ադրբեջանը վիլայեթից ոչ ավել կարգավիճակ ունի այսօրվա դրությամբ։ Ինչպես տեսանք այս ամենին արձագանքեց նաև Էրդողանը, որն իհարկե պատասխան ստացավ։ Բայց այս ամենով հանդերձ կողմերը նաև հակված են համագործակցության՝ տնտեսական և այլ ոլորտներում։ Իրանը հետևողական ձգտում է ախորժակները զսպել, որպեսզի մոռանան «Զանգեզուրի միջանցքի» երազանքի մասին, որի դեմ հստակ կողմնորոշում է հայտնել ՀՀ արտգործնախարարը Թեհրանում ու տարբեր մակարդակի այլ հանդիպումներում։ Սա նաև նպաստում է այն հանգամանքին, որ երկու երկրներն առավել ակտիվորեն համագործակցեն, արագ կառուցե Իրան-Հայաստան խոշոր մայրուղին, որպեսզի զսպեն նրանց ախորժակը»,-եզրափակեց Էմմա Բեգիջանյանը։
