Երբ որ գնաճ է լինում, և դու փորձես դա կանխել աշխատավարձի մեխանիկական բարձրացմամբ, ապա դու ավելի կգեներացնես գնաճը: Գնաճի առումով մենք գտնվում ենք թույլատրելի սահմանից մոտ 2,5 տոկոսով ավելի նշագծի վրա, դա արդեն իրողություն է, որը պայմանավորված է ոչ թե Հայաստանով, այլ միջազգային շատ գործընթացներով, առաջին հերթին կովիդով: Այս մասին «Առաջին լրատվական»-ի հետ զրույցում նշեց ԱԺ «Քաղաքացիական պայմանագիր» խմբակցության պատգամավոր Հովիկ Աղազարյանը՝ հավելելով, որ այդ միտումն ամբողջ աշխարհում է:
Դիտարկմանը, որ գնաճին զուգահեռ չկա աշխատավարձի բարձրացման հստակ տեսլական, նա արձագանքեց. «Երբ որ գնաճ է լինում, և դու փորձես այդ գնաճի հետևանքները վերացնել աշխատավարձի կամ թոշակների մեխանիկական բարձրացմամբ, ապա դու ավելի կգեներացնես գնաճը և շղթայական ձևով դա անընդհատ կավելանա: Ցավոք սրտի գնաճի դեպքում մեր քաղաքացիների ռեալ եկամուտները անկում են ապրում և ավելի է դժվարանում ապրելը, բայց այդուհանդերձ, պետք է այստեղ ֆինանսական զսպվածություն ցուցաբերել, որպեսզի չգեներացնենք ավելի մեծ գնաճ և կամաց-կամաց դարձնել տանելի»:
