Թուրքական Radikal թերթի փոխանցմամբ՝ օգոստոսի 20-ին հրապարակվելու է Պալմերի հանձնաժողովի կողմից «Մավի Մարմարա»-ի միջադեպի հետաքննությանն առնչվող զեկույցը։ Մինչ այդ Թուրքիան ու Իսրայելը փորձում են համաձայնության գալ ներողություն խնդրելու և փոխհատուցում վճարելու վերաբերյալ։
Մասնավորապես, Թուրքիան Իսրայելից պահանջում է ներողություն խնդրել և 50.000-ական դոլար փոխհատուցում վճարել «Մավի Մարմարա»-ի միջադեպի արդյունքում զոհված թուրքերի հարազատներին։ Մինչդեռ Իսրայելն ընդդիմանում է դրան՝ հայտարարելով, որ պատրաստ է նրանց վճարել 100.000-ական դոլար փոխհատուցում, սակայն ներողություն խնդրելու փոխարեն գործածել «ցավակցանք» բառը։
Հիշեցնենք, որ 2010 թվականի մայիսի 31-ի գիշերը Իսրայելի ռազմածովային ուժերը հարձակում գործեցին «Մեր ուղեգիծը Պաղեստինն է, իսկ բեռը՝ մարդասիրական օգնություն» կարգախոսով, վեց նավից բաղկացած «Ազատության նավատորմի» վրա, որը 10 տոննա հումանիտար օգնություն էր տանում Գազա:
Հարձակման հետևանքով 16 մարդ սպանվեց, մոտ 30-ը՝ վիրավորվեց: Զոհվածների թվում էին Թուրքիայի 9 պաղեստինամետ քաղաքացիներ: Իսրայելը վստահեցնում էր, որ 6 նավերով Գազայի հատված ուղևորվող շուրջ 700 ակտիվիստները նաև զենք են կրել:
Թուրքիայի արտգործնախարար Ահմեդ Դավութօղլուն դա որակեց որպես «թուրքական սեպտեմբերի 11»` միջազգային հանրության ուշադրությունը հրավիրելով այն բանի վրա, որ իրենց քաղաքացիները սպանվել են այլ երկրի կանոնավոր բանակի կողմից, իսկ Թուրքիայի վարչապետ Էրդողանը հայտարարեց, որ Իսրայելը զբաղվում է «ծովահենությամբ»։
Դրանից հետո թուրքական կողմն Իսրայելից շարունակ պահանջում է ներողություն խնդրել և փոխհատուցում վճարել տուժածների ընտանիքներին, ինչն, ըստ իսրայելական կողմի, նշանակում էր հանձնվել ահաբեկչությանը: