Ադրբեջանական 1news.az-ի փոխանցմամբ՝ Ադրբեջանում ԵՄ-ի ներկայացուցչության ղեկավար Ռոլանդ Կոբիան հայտարարել է, որ անհրաժեշտ է արագացնել ղարաբաղյան հակամարտության կարգավորումը.
«Դժբախտաբար, Կազանում տեղի ունեցած եռակողմ հանդիպման ժամանակ Ադրբեջանի ու Հայաստանի նախագահները չկարողացան համաձայնության գալ ղարաբաղյան հակամարտության կարգավորման շուրջ։ Սակայն դա չի նշանակում, թե բանակցություններն ավարտվեցին կրախով։ Չէ՞ որ ոչ վաղ անցյալում Սոչիում տեղի ունեցած Ադրբեջանի ու Ռուսաստանի նախագահների հանդիպումը հանգեցրեց որոշակի դրական արդյունքի։
Մենք ղարաբաղյան բանակցային գործընթացը տապալված չենք համարում, ինչի համար էլ ցանկանում ենք, որ այդ գործընթացը շարունակվի։ Մեզ տխրեցնում են շփման գծում գրանցվող միջադեպերը, որոնք մարդկային կյանքեր են խլում։ Հաշտեցման ու զինադադարի ռեժիմի պահպանման դեպքում չպետք է գրանցվեն նմանատիպ միջադեպեր, չպետք է զոհեր լինեն։ Ադրբեջանն ու Հայաստանը պետք է խստորեն պահպանեն հրադադարի ռեժիմը»։
Հիշեցնենք, որ ներկայումս ԵՄ-ը խորապես ցանկանում է ընդգրկվել ղարաբաղյան բանակցային գործընթացի միջնորդների թվում։
