Էկվադորի իշխանությունները երկրում արտակարգ դրություն են հայտարարել՝ հանցավորության և թմրաշրջանառության, զենքի անօրինական շրջանառության դեմ պայքարի համար։ Այս մասին հայտարարել է նախագահ Գիլերմո Լասոն, փոխանցում է RIA Novosti-ն։
«Մեր զինված ուժերն ու ոստիկանությունն անհապաղ դուրս կգան փողոցներ, քանի որ մենք արտակարգ դրություն ենք հայտարարում երկրի ողջ տարածքում»,-ասել է նա ժողովրդին հղված ուղերձում։
Հիմնական շեշտադրումը կլինի բռնության բարձր մակարդակ ունեցող նահանգներում, հատկապես Գուայասում։ Փողոցներում 24 ժամ կիրականացվի պարեկություն։
Լասոն նշել է, որ Էկվադորի փողոցներում գլխավոր թշնամի թմրաթրաֆիկն է։ Նրա խոսքով՝ երկրում թմրանյութերի օգտագործման աճին զուգահեռ ավելացել է սպանությունների, թալանի թիվը։ Վերոնշյալ նահանգում բռնության ավելի քան 70 տոկոս դեպքերը կապված են թմրանյութերի վաճառքի հետ։
Կիրակի սրճարաններից մեկում ոստիկանության ու կողոպտիչների միջև փոխհրաձգության հետևանքով 11-ամյա տղա է զոհվել։
Երկուշաբթի նախագահը պաշտպանության նոր նախարար է նշանակել, նա գեներալ Լուիս Էրնանդեսն է։
