Ադրբեջանական APA լրատվական գործակալությանը տված հարցազրույցի ժամանակ Կասպյան տարածաշրջանում անվտանգության, քաղաքական ու տնտեսական հարցերով ամերիկացի փորձագետ Ալեքս Ջեքսոնն անդրադարձել է Հարավային Կովկասի անվտանգության խնդիրներին.
«Հարավային Կովկասում իրավիճակը մնում է խոցելի ու անորոշ։ Այն խնդիրները, որոնց բախվել է տարածաշրջանը, դեռևս լուծված չեն։ Վրաստանի ու Ռուսաստանի հարաբերությունները շարունակում են մնալ լարված և չնայած դրան՝ կողմերից ոչ մեկը քաղաքական պատճառներով չի համարձակվի վերսկսել պատերազմը։
Ղարաբաղյան հակամարտությունը նույնպես շատ լուրջ խնդիր է։ Դժվար է այս հարցում կանխատեսումներ անելը։ Չնայած խնդրի քաղաքական լուծման հարցում արդեն 17 տարի է, ինչ առաջընթաց չի գրանցվում՝ պատերազմի վերսկսման հավանականությունը փոքր է։ Միջնորդների համբերությունը սպառվում է, սակայն ո՛չ Բաքուն, ո՛չ էլ Երևանը բանակցությունները դադարեցնելու և բանակցային նոր ձևաչափ պահանջելու խթան չունեն։ Ստատուս-քվոն շարունակում է մնալ։
Հարավային Կովկասի հակամարտությունների արմատական պատճառները վերացված չեն և այդ հակամարտությունները սպառնում են տարածաշրջանի երկարատև կայունությանն ու խաղաղությանը։ Հազիվ թե, այս տարի որևէ արմատական փոփոխություններ տեղի ունենան տարածաշրջանում։
Ամենամեծ հավանականությունն ունի հայ-թուրքական հարաբերությունների կարգավորումը։ Չնայած թուրքական կառավարությունը հունիսին տեղի ունեցած խորհրդարանական ընտրություններում տարած հաղթանակից հետո մեծ ուշադրություն է հատկացնում տվյալ խնդրին, այնուամենայնիվ դա դեռ տեղի չի ունեցել։
Հայաստանի կառավարությունը չի կարող իրեն թույլ տալ ընտրությունների նախաշեմին քաղաքական կապիտալ վատնել այդ հարցի վրա։ Չնայած Հայաստանի ընդդիմությունը շատ թույլ է թվում, որպեսզի կարողանա իշխող կուսակցությանը թելադրել իր կամքը՝ Հայաստանի քաղաքականությունը շատ փոփոխական է։ Դրա համար էլ ամեն ինչ կարող է շատ արագ փոխվել»։
