«Առաջին լրատվական»-ի զրուցակիցն է Ստամբուլի «Ակօս» թերթի հայերեն էջերի խմբագիր Բագրատ Էստուկյանը։
-Պարոն Էստուկյան, Սոչիում անցկացվեց Էրդողան-Պուտին բանակցությունները, արծարծվում է նաև ղարաբաղյան հակամարտության կարգավորման թեման։ Ռուս-թուրքական բանակցություններից ի՞նչ վտանգներ սպասել։
-Այն վտանգը, որ տեղի ունեցավ և որոշ չափով ավարտված կարող ենք համարել՝ անշուշտ 44 օրյա պատերազմն էր։ Ափսոս, որ այն տեղի ունեցավ; Այժմ մեր առջև ավելի շատ քաղաքական խնդիրներ կան, որոնց մենք պետք է խիստ ուշադիր ու զգույշ լինենք։ Չպետք է սպասենք, թե ռուս-թուրքական հարաբերությունների մերձեցումն ի օգուտ մեզ կլինի։ Իշխող կառավարությունը պետք է զգույշ լինի։ Մենք տեսնում ենք, որ Հայաստանի առջև անընդհատ նախապայմաններ են դրվում։ Մինչև երեկ նախագահ Էրդողանը պահանջում էր Զանգեզուրի միջանցք, այս անգամ նաև պահանջում է Ադրբեջանի հետ կնքվելիք խաղաղության պայմանագիր։ Էրդողանը երբեք չի հրաժարվելու նախապայմաններ առաջ քաշելուց, հետևաբար Թուրքիայի հանդեպ պետք է շատ զուսպ լինել։
-Էրդողանն անընդհատ առաջ է քաշում 3+3 ձևաչափը և հավանաբար նաև դա են քննարկել ՌԴ ղեկավարի հետ։ Ինչքանո՞վ է հավանական դրա իրագործումը։
-Թուրքիան անընդհատ ուզում է գործընթացներին մասնակից լինել, վստահաբար դա երբեք չի ժխտի նաև Ռուսաստանը։ Պուտինը կարևորում է Թուրքիայի հետ համագործակցությունը և հետևաբար նրան դեմ չի գնա։ Պետք է սպասել։ Այժմ դժվար է կանխատեսել, թե ինչ կարող է լինել։ Վտանգները մշտապես առկա են։
-Թուրքիայի նախագահի խոսնակը հայ-թուրքական հարաբերությունները պայմանավորում է Ադրբեջանով, նաև Չավուշօղլուն է նշել, որ Հայաստանի հետ հարաբերությունների կարգավորմանը կգնան իրենց գործողությունները սինխրոնացնելով ադրբեջանական կողմի հետ։
-Մենք առաջին պատերազմի ավարտին լցված էինք խաղաղության ցանկությամբ։ Մենք ուզում էինք, որ մեր պսակած հաղթանակը խաղաղության դաշինքով ամրագրվի։ Եթե հիշում եք՝ մենք Արարատի կոնյակի գործարանում տակառ կնքեցինք ու հայտարարեցինք, որ այդ պետք է բացվի խաղաղության դաշինքի կնքման օրը։ Այսօր այդ հանգրվանը բավականին հեռու է։ Այո՛, մենք պահանջում ենք խաղաղության դաշինք, բայց ոչ մեր երկրի անվտանգության հաշվին։ Գորիս-Կապան ճանապարհն առ այս պահը սպառնալիքի տակ է, Իրանի հետ մեր ցամաքային կապը՝ ևս։ Հետևաբար այս պայմաններում մենք տակավին հեռու ենք խաղաղության դաշինք ստորագրելուց։