Ամարաս վանական համալիրի վրայից Արցախի դրոշը վերջնականապես հանվել է: Այլևս Ամարասի վրա ոչ մի դրոշ չկա: ռուսները պհանջեցին, որ հանվի դրոշը»,- «Առաջին լրատվական»-ի հետ զրույցում նշեց Արցախի Մարտունու շրջանի Մաճկալաշեն համայնքի ղեկավար Մաճկալաշենի համայնքապետ Լեռնիկ Ավանեսյանը:
«3-4 օր առաջ նորից եկան հանեցին ու ասացին՝ էլ ոչ մի դրոշ չբերեք, դնեք»,-ասաց նա:
Հարցին, թե բնակիչները չընդդիմացա՞ն, համայնքապետը պատասխանեց. «Դե մի դրոշի համար ռուսների հետ կռվե՞նք: Առաջ ասում էին՝ կարող եք Արցախի դրոշի փոխարեն Հայաստանի դրոշը դնել, հիմա ասում են՝ ոչ մի դրոշ չի լինելու»:
Ինչ վերաբերում է նրան, որ դա արվել է ադրբեջանցիների պահանջով, Ավանեսյանն ասաց. «Ես դա չեմ կարող ասել: Դա ենթադրություն է, ես չեմ կարող ենթադրություններով առաջնորդվել: Թե ով է իրենց ասել, ես չեմ կարող ասել: Ռուսներն իրենք գնացել, իրենց ձեռքով իջեցրել են: Դա եղել է բարձրաստիճան սպա: Իմ անձնական կարծիքով, պետք չի ռուսներին ընդդիմանալ, որովհետև մեր անվտանգությունը ապահովողն իրենք են: Մեր գյուղից ընդամենը մեկ կմ է իրենց պոստը հեռու: Դրա համար էլ իրենք իրենց ձեռքով հանել են ու մեզ ասել՝ էլ չդնեք»:
Դիտարկմանը, որ մի օր էլ կարող է ռուսներն ասեն՝ դուրս եկեք գյուղից, էլի չեն ընդդիմանալո՞ւ, Մաճկալաշենի համայնքապետն արձագանքեց. «Դա դա ուրիշ հարց է»:
Նույն խնդրի առնչությամբ Արցախի Ազգային ժողովի «Ազատ Հայրենիք-ՔԴՄ» խմբակցության ղեկավար Արթուր Հարությունյանն էլ ասաց. «Հիմա ռուս խաղաղապահների միջոցով այդ հարցը որոշակի լուծում ստացել է ամեն դեպքում: Չգիտեմ, թե այս պահին մեկնաբանելը որքանով հետագայում արդյունք կտա, կամ չի տա: Դրա համար չեմ ուզում մեկնաբանել: Այս պահին իրավիճակն այնքան փխրուն է, որ ամեն հարցի վերաբերյալ դիրքորոշում ներկայացնելը կարող է ավելի շատ վնաս տալ, քան հարցին լուծում տալ»:
Հարցին, թե արդյոք Արցախում ցանկացած վանական համալիրի վրայից եթե ռուսները որոշեն հանել Արցախի դրոշը, պետք է լռեք, Հարությունյանը պատասխանեց. «Ոչ, այդպես չի»: Նրա խոսքով, պայմանավորվածություն է եղել այն կողմից Ադրբեջանի դրոշը հանեն, այս կողմից Արցախի. «Բայց եկեք չմեկնաբանեմ: Եթե մեկնաբանելու լիներ, մենք հանրայնորեն դրա մասին կխոսեինք: Չեմ կարծում, որ այս պահին մեկնաբանությունը որոշակի դրական ազդեցություն է ունենալու: Եվ մեր ռուս խաղաղապահների համար, և մեր, և ընդհանուր իրավիճակից ելնելով եմ ասում: Ամեն դեպքում այնպես չէ, որ իրենք կարող են ասել՝ էս մեկն էլ հանեք, էն մեկն էլ, մենք էլ հանենք: Ուղղակի այնտեղ որոշակի հարցեր կան, որոնք երկկողմանի համատեղ լուծում են ստացել: Հանրությանը հուզող շատ հարցեր կան, որոնց վերաբերյալ կարող ենք մեկնաբանություն տալ, բայց էս մեկին՝ ոչ»:
