Արաբկիր վարչական շրջանի ղեկավար Էդուարդ Մուշեղյանը շաբաթ օրը հանդիպել է Փափազյան փողոցում տեղակայված կրպակների տերերի հետ, որից հետո քաղաքապետարանը ևս մեկ անգամ հաստատել է, որ շրջանի ղեկավարը, կրպակատերերին ներկայացնելով խնդրի առնչությամբ քաղաքապետարանի մոտեցումներն ու դիրքորոշումը՝ մեկ անգամ ևս ընդգծել է , որ ապամոնտաժման են ենթարկվում միայն կենտրոնական փողոցներում տեղակայված, պայմանագրային ժամկետներն ավարտված և ապօրինի գործող կամ լքյալ կրպակները։
Ընդ որում՝ շեշտվել է, որ անկախ կրպակների կարգավիճակից, բոլորին այլընտրանք է առաջարկվում։ Մասնավորապես, առաջարկվում է վարչական շրջանի մեկ այլ հատվածում ստեղծել պահանջվող չափորոշիչներին համապատասխանող կրպակաշար և, համապատասխան փաստաթղթերի օրինական ձևակերպումից հետո, ստանալով Երևանի քաղաքապետի որոշումը, շարունակել առևտրային գործունեությունն արդեն թույլատրված, քաղաքակիրթ պայմաններում և օրինական դաշտում։
Այսօր «Առաջին լրատվական» զրուցեց Փափազյան փողոցի կրպակատերերից Աննա Կիրակոսյանի հետ՝ հասկանալու համար, թե կրպակատերերին անհանգստացնող խնդիրները դրական լուծում ստանո՞ւմ են, թե՞ ոչ: Նրա խոսքերով՝ վարչական շրջանի ղեկավար Էդուարդ Մուշեղյանն առաջարկել է, որ կրպակները կրպակատերերն իրենց ուժերով տեղադրեն, բայց այս պահին ապամոնտաժված կրպակների տերերը դրա հնարավորությունը չունեն: Բացի այդ, կրպակատերերի փոխանցմամբ՝ այնպիսի տարածքներ են առաջարկվում, որտեղ բնակչություն չկա, հետևաբար չի կարող առևտուր իրականցվել: Մի հատվածում հիմնարկ-ձեռնարկություններ են, իսկ մյուսն անմարդաբնակ է: Ավելին՝ կրպակների տեղափոխման ամբողջ ծախսը թողնվում է կրպակատերերի վրա: Առևտրականներին առաջարկել են, որ վարչական շրջանը կառուցի և կրպակները վարձակալությամբ հատկացնի իրենց, բայց առևտրականների խոսքերով, իրենց այդ տարբերակն էլ ձեռք չի տալիս:
Ինչ վերաբերում է ապամոնտաժման ենթարկված կրպակների տերերին փոխհատուցում տալուն, առևտրականները նշեցին, որ իրենց մինչ օրս փոխհատուցում չի տրամադրվել, միայն տեղերն են առաջարկել, որոնք հարմար չեն. «Պարզապես նշեցին, որ եթե հնարավորություն չունենք, իրենք կօգնեն, որ վերանորոգենք կրպակը, սակայն գումարը հետագայում պետք է վերադարձնենք իրենց»:
Նաև տեղեկացանք, որ ներկա պահին Փափազյան փողոցում կրպակների ապամոնտաժումը դադարեցվել է: Աննային Փափազյան փողոցում ընդամենը 3 կրպակ է մնացել, և քանի որ այդ կրպակների վարձակալության ժամկետը դեռ չի ավարտվել, նրան չեն անհանգստացնում:
Շաբաթ օրը նորից պետք է հանդիպեն վարչական բաժնի պետի տեղակալի հետ: Հանդիպման ընթացքում քննարկման են դրվելու երկու կողմերի առաջարկած տարբերակները և փորձելու են ընդհանուր հայտարարի գալ:
