2004 թվականից պետության կողմից երաշխավորված անվճար բժշկական օգնությունն ու սպասարկումն իրականացվում է ամենամյա առողջապահական պետական նպատակային ծրագրերին համապատասխան:
Ամբողջ բնակչության համար արտահիվանդանոցային բժշկական oգնությունն իրականացվում է անվճար:
«Ես ինքս դրա ջատագովն եմ, դա պարտադիր բժշկական ապահովագրությանը անցնելու կարևոր քայլերից մեկն էր: Այլ բան է, երբ քաղաքացիները չգիտեն իրենց իրավունքները և չեն պահանջում բժիշկներից կատարել իրենց պարտականությունները, որոնք նրանք պարտավոր են կատարելու բյուջեից հատկացված միջոցների հաշվին: Հաճախ այն դեղերը, որոնք պետք է հատկացվեն բնակչությանը անվճար, չեն հատկացվում և դրա միջոցով բիզնես են անում»,- «Առաջին լրատվական»-ի հետ զրույցում ասաց տնտեսագետ Մովսես Արիստակեսյանը:
«Կա բժիշկների որակավորման բարձրացման խնդիր, վստահություն չկա բժշկի հանդեպ, որովհետեև հետևողական աշխատանքներ չեն կատարվում մասնագետների որակի բարձրացման ուղղությամբ: Պետական բյուջեի միջոցների հաշվին թարմացում չի կատարվում նաև տեխնիկական բազայում, բավարար պայմաններ չկան կանխարգելիչ միջոցառումների անցկացման համար:
Մեծացել են կոռուպցիոն ռիսկերը, և պոլիկլինիկայի վարիչները դարձել են դեղերի բիզնեսով զբաղվող կազմակերպության ղեկավարներ, հաճախ ստեղծում են անկախ ախտորոշիչ կայաններ և հիվանդին ուղարկում այնտեղ, ոչ թե իրենք են մատուցում այդ ծառայությունը»,- ավելացրեց տնտեսագետը:
