Թուրքական Radikal թերթի փոխանցմամբ՝ Արարատ (թուրքական անվանումը՝ Աղրը Դաղ) լեռան վրա տնկվել է 10 միլիոն ծառ։ Այս մասին հայտարարել է Իգդիրի շրջակա միջավայրի ու անտառտնտեսության պետ Թաներ Թազեգյունը։
Վերջինս նշել է. «Մայիսին Եվրոպայի ամենաբարձր լեռը հանդիսացող Արարատ լեռան 2500 մետր բարձրության վրա տնկել ենք ցրտադիմացկուն պտղատու ծառեր։ Արարատ լեռան այդ հատվածը նայում է դեպի Իգդիր։ Ես հիանում եմ այդ ծառերի բազմազանությամբ»։
Հիշեցնենք, որ օրեր առաջ թուրքական Zaman թերթը գրել էր, որ Թուրքիայում հեշտացվել է օտարազգի զբոսաշրջիկների կողմից Արարատ լեռ բարձրանալու գործընթացը. «Այսուհետ նրանք լեռան գագաթ բարձրանալու համար ստիպված չեն լինի ստանալ Թուրքիայի ներքին գործերի նախարարության ու Ազգային հետախուզական կազմակերպության (MIT) թույլտվությունը։
Այժմ դրանով զբաղվելու է արտաքին գործերի նախարարությունը, որը լեռ բարձրանալու հայտերը ստանալուց հետո դրանք ուղարկելու է Աղրըի ու Իգդիրի նահանգներ (լեռան 35 տոկոսը Իգդիրի, 65 տոկոսը՝ Աղրըի վարչական տարածքում է), որոնք էլ համապատասխան որոշում են ընդունելու։ Այս ամենն արվում է ավելորդ քաշքշուկներից խուսափելու համար»։
Ի դեպ, Արարատ լեռը գտնվում է Հայաստանի սահմանից 32 և Իրանի սահմանից 16 կիլոմետր հեռավորության վրա։
