«Ռոլան» մանկապատանեկան ֆիլմերի 17-րդ միջազգային փառատոնը, չնայած կորոնավիրուսով պայմանավորված դժվարություններին, կարողացավ իր առջև դրված խնդիրներն իրականացնել՝ 40 (և ավելի) օր մշակութային տոն պարգևելով երեխաներին:
«Արմենպրես»-ի մամուլի սրահում հրավիրված ասուլիսում, ամփոփելով փառատոնի արդյունքները՝ «Ռոլան» մանկապատանեկան ֆիլմերի միջազգային փառատոնի նախագահ, Հայաստանի «Ռոլան Բիկով» հիմնադրամի նախագահ Նունե Մանուկյանը նշեց, որ օգոստոսի սկզբին մեկնարկած միջոցառումն անցկացվել է բավական հագեցած ծրագրով՝ հարմարվելով կորոնավիրուսային իրավիճակին:
«Ռոլան» մանկապատանեկան ֆիլմերի 17-րդ միջազգային փառատոնն այս տարի առաջին անգամ իրականացվեց երկու փուլով՝ հիբրիդային նոր օֆլայն և օնլայն ձևաչափերով: Մենք նպատակ էինք դրել շարունակել ծրագրերի և միջոցառումների ապակենտրոնացումը՝ Երևանից դեպի մարզեր՝ հատկապես սահմանամերձ, և Արցախ: Ցանկանում էինք ստեղծել նպաստավոր պայմաններ՝ օգտագործելով փառատոնը որպես կայուն և վստահելի միջազգային հարթակ՝ երեխաների, պատանիների և երիտասարդների համար: Նպատակ ունեինք վերջիններիս ակտիվ ներգրավվածության և մասնակցության շնորհիվ փոքր-ինչ մեղմել պատերազմի հետևանքով առաջացած բարոյահոգեբանական վիճակն ու նպաստել ստեղծված մթնոլորտի բարելավմանն ու առողջացմանը»,- նշեց Նունե Մանուկյանը:
Երևանում, Տավուշում, Գեղարքունիքում, Լոռիում, Շիրակում, Սյունիքում իրականացվել են ֆիլմերի օֆլայն ցուցադրություններ, եղել են պրեմիերաներ: Ցուցադրություններ են կազմակերպվել դպրոցներում, նախակրթարաններում, ամառային ճամբարներում, եղել են վարպետության դասեր, քննարկումներ, հանդիպումներ ՝ մասնակից դարձնելով երեխաներին ու երիտասարդներին:
