Վրաստանի ներքին գործերի նախարարության նախնական տեղեկությունների համաձայն՝ զինված անձը ներխուժել է բանկի մասնաճյուղ ժամը 16:00-ի սահմաններում: Այս մասին հաղորդում է 1tv.ge-ն։
Ականատեսների վկայությամբ, դիմակավորված հարձակվողը ձեռքին նռնակ էր պահում եւ սպառնում պայթեցնել այն:
Հաղորդվում է, որ հարձակվողը պատանդներին ազատ արձակելու դիմաց կես միլիոն գումար է պահանջել
Ներքին գործերի նախարարությունը պաշտոնական տեղեկատվություն է հրապարակել Կվարելիում բանկի վրա հարձակման վերաբերյալ:
Ստանալով հարձակման մասին հաղորդագրությունը, ոստիկանության աշխատակիցներն անմիջապես շրջափակել են դեպքի վայրի հարակից տարածքը: Ներկայում տեղում մոբիլիզացված իրավապահները ձեռնարկում են բոլոր անհրաժեշտ և անհետաձգելի միջոցառումները, ինչպես նաև կատարվում են քննչական և օպերատիվ միջոցառումներ:
Վրաստանի ներքին գործերի նախարարության ներկայացուցիչ Քեթի Կովզիաշվիլիի հայտարարությամբ, Կվարելիում հատուկ գործողությունը շարունակվում և ընթանում են հետաքննչական գործողություններ։
Նրա խոսքով՝ շենքում այլևս ոչ մի պատանդ չկա:
«Բոլոր պատանդներն ազատ են, հաղորդագրությունը ստանալուն պես ակտիվ քննչական գործողություններ սկսվեցին, և դրանք դեռ շարունակվում են: Քննչական գործողությունների շրջանակներում պարզվում է նաև անձի ինքնությունը: Պատանդներից ոչ մեկն այլևս բանկի շենքում չէ: Ոչ մի մարդու կյանքին վտանգ չի սպառնում: Ոստիկանական ուժերը գտնվում են տարածքում»,-ասել է Ներքին գործերի նախարարության ներկայացուցիչը:
