ՀՀ գլխավոր դատախազի խորհրդական Գոռ Աբրահամյանը երեկ հայտնել է, որ դատախազությունն Ընդհանուր իրավասության առաջին ատյանի դատարանում հրաժարվել է «2008թ. մարտի 1-ի» գործով դատապարտյալ Արամ Բարեղամյանին առաջադրված մեղադրանքից։
Հիշեցնենք, որ Երևանի քրեական դատարանի 2008թ. հուլիսի 14-ի դատավճռով Արամ Բարեղամյանը մեղավոր էր ճանաչվել 2008թ. մարտիմեկյան իրադարձությունների շրջանակներում ՀՀ քրեական օրենսգրքի 316-րդ հոդվածի 2-րդ մասով և 112-րդ հոդվածի 2-րդ մասի երկրորդ կետով նախատեսված հանցավոր արարքները կատարելու մեջ և դատապարտվել ազատազրկման՝ 6 տարի ժամկետով: ՀՀ վերաքննիչ քրեական դատարանը 2008թ. հոկտեմբերի 3-ին կայացրած որոշմամբ ուժի մեջ էր թողել այդ որոշումը:
2019թ., ՀՀ գլխավոր դատախազի տեղակալի կողմից հիմնարար խախտման հիմքով բողոք էր ներկայացվել ՀՀ վճռաբեկ դատարան՝ միջնորդելով բեկանել և փոփոխել Արամ Բարեղամյանի վերաբերյալ վերոնշյալ դատական ակտերը՝ ճանաչելով և հռչակելով նրա անմեղությունը մեղսագրված արարքներում:2020թ. մայիսի 25-ին ՀՀ վճռաբեկ դատարանը մասնակի բավարարել էր բողոքը, բեկանել էր այդ դատական ակտերը և քարեական գործն ուղարկել էր Առաջին ատյանի ընդհանուր իրավասության դատարան՝ նոր քննության:Եվ արդեն 2021թ. սեպտեմբերի 6-ին Ընդհանուր իրավասության առաջին ատյանի դատարանում դատախազը հանդես է եկել հայտարարությամբ՝ հրաժարվելով 2008թ. մարտի մեկի գործով դատապարտյալ Արամ Բարեղամյանին առաջադրված մեղադրանքից։
«Առաջին լրատվական»-ի հետ զրույցում Արամ Բարեղամյանն ասաց, որ իր համար այս որոշումը սպասելի էր․«Այն ժամանակ էլ ինձ անհիմն էր մեղադրանք առաջադրվել, հստակ հանձնարարական կար՝ առանց որևէ հիմնավոր ապացույցի»։
Բարեղամյանի կարծիքով՝ նախկին իշխանությունների օրոք դատարանն այսպիսի վճիռ չէր կայացնի․«Բնականաբար այդ հանգամանքը կա։ Ընդհանրապես ՝ դատական համակարգը պետք է փոխվի, մարդիկ չեն էլ կարողանում դատարաններ դիմել։ Գործերը տարիներով ձգձգվում են։ Կոնկրետ իմ արդարացման համա 2018 թվականին ենք դիմել, բայց երեք տարի անց նոր այսպիսի որոշում է կայացվում։ Ես չէ, որ պետք է գնահատեմ դատական համակարգի վիճակը, բայց ես մեծ ցանկություն ունեմ, որ իմ բոլոր ընկերների նկատմամբ արդարացման ակտ կայանա»,-եզրափակեց նա։
Իրավապաշտպան Վարդան Հարությունյանն «Առաջին լրատվական»-ի հետ զրույցում դատարանի որոշումը դրական է գնահատում, սակայն բացասական է համարում այն հանգամանքը, որ վերջին երեք տարիների ընթացքում նախկին քաղբանտարկյալների արդարացման գործը չափից ավելի դանդաղ է ընթանում․«Չնայած այն հանգամանքին, որ այդ կապակցությամբ ժամանակին դատախազության հետ պայմանավորվածություններ են ձեռք բերվել։ Հիմա քանի որ մենք տեսանք, որ պրոցեսը շատ դանդաղ է ընթանում՝ որոշել ենք, որ նոր թափով պետք է սկսել։ Նախնական կարող եմ ասել, որ մոտ ժամանակահատվածում կկազմակերպենք, որ դատարաններում բողոքներն ավելի շատ լինեն ու կփորձենք այնպես անել, որ դատարանները կատարեն իրենց գործառույթներն ու արդարացման գործն արագանա»։
Հարությունյանն ընդգծեց՝ որոշումը կայացվել է Հայաստանում տեղի ունեցած իշխանափոխության արդյունքում․«Անմիջապես կապում եմ իշխանափոխության հետ։ Եթե դա չլիներ՝ արդարացման գործընթաց չէր էլ լինելու, բայց մի բան է, որ կա այդ գործընթացը և բոլորովին այլ բան, որ այն չափից ավելի դանդաղ է իրականացվում»: