Աֆղանստանում «Թալիբան» շարժման իշխանության գալը վկայում է Արևմուտքի ակնհայտ պարտության մասին։ Այս մասին հայտարարել է ԵՄ արտաքին և անվտանգության քաղաքականության հարցերով գերագույն ներկայացուցիչ Ժոզեպ Բորելը։
«Դա Արևմուտքի ակնհայտ պարտություն է և էական փոփոխություն միջազգային հարաբերություններում։ Առաջին հերթին Եվրոպային պետք է շատ դասեր քաղել անցյալից, թե ինչպիսի հարաբերություններ ունենալ աշխարհի այդ հատվածի հետ, որը հրաժարվում է ընդունել մեր արժեքները»,-ասել է նա իսպանական Onda Cero ռադիոկայանի հետ հարցազրույցում։
Բորելի խոսքով՝ Աֆղանստանը կորսվել է ոչ թե 10 օրում, այլ 10 տարում, քանի որ արևմտյան երկրները չեն կարողացել օգնել իսլամական հանրապետությունում դնել ժամանակակից պետության հիմքեր։
Եվրոպական դիվանագիտության ղեկավարը չի համաձայնել ԱՄՆ նախագահ Ջո Բայդենի հայտարարության հետ, որ Աֆղանստանում օպերացիայի նպատակը եղել է պարզապես պայքարն ահաբեկչության դեմ։ Բորելի կարծիքով՝ եղել է նաև ինստիտուտների կառուցման հանձնարարություն, որոնք հարգում են մարդու, մասնավորապես կանանց իրավունքները։
