Այսօր, երեկոյան ժամը 20:00-ից Թումոյում կշարունակվեն ստեղծարար տեխնոլոգիական կենտրոնի բացման արարողությունները: Ինչպես և երեկ, ելույթ կունենա «Ռեինկարնացիա» խումբը, կցուցադրվի կենտրոնի բարերարներ Սիլվա և Սեմ Սիմոնյանների ողջույնի խոսքը՝ հատուկ 3D արտապատկերումով, իսկ հետո մինչև ժամը 01:00 կշարունակվի երիտասարդական երեկույթը` DJ BaxStar-ի պարային երաժշտության ուղեկցությամբ:
Այսօր ևս կկատարվի կենտրոնում սովորելու ցանկություն ունեցող 12-18 տարեկան պատանիների նախնական գրանցում:
Նկատենք սակայն, որ երեկ համերգի ժամանակ հանդիսատեսը «բաժանված» էր 3 մասի`մի մասն առանձնացված հատվածում աթոռների «իրավունք» ուներ, բեմը շրջապատող փոքրիկ պարսպից ներս էին թողնում միայն տոմս ունեցողներին, ընդ որում՝ տոմսերը նախորդ օրերին պատահականության սկզբունքով բաժանվել էին անցորդներին, իսկ նման բախտի չարժանացած հանդիսատեսը համերգին և բեմի մոտ կազմակերպված խաղին հետևում էր պարսպի մյուս կողմից:
