Ադրբեջանական Turan լրատվական գործակալության փոխանցմամբ՝ Ադրբեջանում ԱՄՆ դեսպանությունն անհանգստություն է հայտնել Բաքվի գործադիր իշխանությունների կողմից Խաղաղության ու ժողովրդավարության ինստիտուտի շենքի ավերման կապակցությամբ։
ԱՄՆ դեսպանության տարածած հաղորդագրության մեջ նշված է. «Հատուկ մտահոգության տեղիք է տալիս այն, որ շինության ավերումն իրականացվել է դրա կանխմանն առնչվող դատարանի՝ մայիսի 24-ի որոշման ոտնահարմամբ։
Բացի այդ, շինության ավերման ժամանակ նրա սեփականատերերը գտնվել են արտասահմանում, ինչի պատճառով էլ չեն կարողացել գրասենյակից դուրս բերել իրենց իրերն ու փաստաթղթերը։ Մենք Ադրբեջանի կառավարությանը կոչ ենք անում երկխոսել Ադրբեջանի տուժած քաղաքացիների հետ՝ նրանց սեփականատիրության իրավունքների ապահովման նպատակով։
Օրենքի գերակայությունը խաղում է հիմնական դեր ազատ ու զարգացած հասարակությունում»։
Հիշեցնենք, որ Բաքվի կենտրոնում գտնվող Խաղաղության ու ժողովրդավարության ինստիտուտի գրանսենյակն ավերվել է օգոստոսի 11-ի երեկոյան։ Գրասենյակի աշխատակից Ազադ Իսազադեն պատմել է.
«Մոտ ժամը 20-ին այստեղ եկան քաղաքապետարանի ու պետական գույքի նախարարության աշխատակիցները և ինձ ասացին, որ պետք է փլատակների վերածեն հարևան շենքը և խնդրեցին ինձ դուրս գալ շենքից, որպեսզի հարևան շենքի քանդման արդյունքում որևէ բան չընկնի մեր գլխին։ Սակայն շենքին մոտեցած էքսկավատորն անսպասելիորեն սկսեց քանդել մեր գրասենյակը»։
Դրանից առաջ գրասենյակի սեփականատեր Լեյլա Յունուսն ամերիկյան The New York Times թերթին հայտնել էր. «Հունիսին ես մեր գրասենյակի պատին գրել եմ. «Սա մասնավոր սեփականություն է, և այս շինության ավերումը հակասում է Սահմանադրությանն ու խախտում է Մարդու իրավունքների եվրոպական կոնվենցիան»։
Օրենքը պետությանը թույլատրում է մարդկանցից խլել նրանց անշարժ գույքը միայն ճանապարհների, հաղորդակցության ուղիների ու պաշտպանական նշանակության օբյեկտների կառուցման համար»։