Ամերիկայի Հայ դատի հանձնախմբի (ANCA) կայքի փոխանցմամբ՝ Թուրքիայում ԱՄՆ դեսպան Ֆրենսիս Ռիկիարդոնեն ակնհայտ կեղծ տեղեկություններ է հաղորդել իրեն հարցեր ուղղած սենատոր Ռոբերտ Մենենդեսին ուղարկած իր գրավոր պատասխանում։
Մասնավորապես, Ռիկիարդոնեն նշել է, որ 1915 թվականին ժամանակակից Թուրքիայի տարածքում գործող հայկական եկեղեցիների մեծ մասը գործում է նաև ներկայումս։
Այս կապակցությամբ ANCA-ի գործադիր տնօրեն Արամ Համբարյանը հայտարարել է, որ դրանով Ռիկիարդոնեն միտումնավոր խեղաթյուրել է պատմական փաստերը, որպեսզի համապատասխանի Հայոց ցեղասպանության հարցում Անկարայի ժխտողական քաղաքականությանը։ Համբարյանը հավելել է, որ Ռիկիարդոնեն ակնհայտորեն ի վիճակի չէ Թուրքիայում արդյունավետորեն պաշտպանել ամերիկյան շահերը կամ արժեքները։
Պատմական գրառումները ցույց են տալիս, որ 1915 թվականին ժամանակակից Թուրքիայի տարածքում գործել են ավելի քան 2000 եկեղեցիներ, մինչդեռ այմ այդտեղ գործող եկեղեցիների քանակը չի հասնում 50-ի։
Հիշեցնենք, որ օգոստոսի 2-ին ԱՄՆ-ի Սենատում Թուրքիայում դեսպանի պաշտոնում Ֆրենսիս Ռիկիարդոնեի հաստատման լսումների ժամանակ, ԱՄՆ-ի նախագահ Բարաք Օբամայի կողմից նշանակված՝ այդ երկրում դեսպանի պաշտոնավարման լրիվ ժամկետին հավակնող Ռիկարդոնեն խուսափել էր Հայոց ցեղասպանության շուրջ ԱՄՆ-ի քաղաքականության մասին սենատոր Մենենդեսի կողմից առաջարկված հարցերին ուղիղ պատասխան տալուց։
Բացի այդ, Ռիկիարդոնեն թույլ բացատրություն էր ներկայացրել Թուրքիայի ներկայիս սահմաններում գոյություն ունեցող քրիստոնյա համայնքների իրավունքների և բարեկեցության վերաբերյալ սենատորների կողմից արտահայտված մտահոգություններին:
Այն ժամանակ Համբարյանը հայտարարել էր. «Ցավոք, այսօր կրկին ականատեսը դարձանք, թե ինչպես երկրի դիվանագիտության բարձրագույն ներկայացուցիչներից մեկը կրկին դիմել է բառախաղի՝ բացահայտ ճշմարտությունն անվանելուց խուսափելու նպատակով։
Ճշմարտությունն ապրանք չէ, և մարդու իրավունքները չեն վաճառվում. Ամերիկան չպետք է վաճառի, կամ, ինչն ավելի վատ է՝ օտարերկրյա պետության ճնշման տակ հրաժարվի ցեղասպանության նկատմամբ իր ունեցած դիրքորոշումից»։
