Ադրբեջանական 1news.az-ի փոխանցմամբ՝ Թուրքիայի վարչապետ Էրդողանն իր ընտանիքի ու արտգործնախարար Ահմեդ Դավութօղլուի հետ Սոմալի կայցելի օգոստոսի 18-ին։
Նշվում է, որ օգոստոսի 17-ին Էրդողանը ելույթ կունենա Ստամբուլում տեղի ունենալիք «Իսլամական համագործակցություն» կազմակերպության (ԻՀԿ, նախկին ԻԿԿ) անդամ երկրների արտգործնախարարների արտակարգ նիստում։ Իր ելույթում Էրդողանն արաբական երկրներին կոչ է անելու օգնել Սոմալիի սովյալներին։
Ավելի վաղ Էրդողանը, ելույթ ունենալով հեռուստաալիքներից մեկով, հայտարարել է. «Սոմալիում բնակվող մարդիկ գտնվում են ծանր իրավիճակում, և մենք նրանց կօգնենք։ Թուրքիան Սոմալիի սովյալներին օգնություն է ցուցաբերելու միանգամից մի շարք ուղղություններով։
Թուրքիան արդեն իսկ հումանիտար օգնություն է ուղարկել Սոմալի, այդ թվում՝ նաև 10 տոննա դեղորայք։ Բացի այդ, Թուրքիան սկսել է աշխատանքներ տանել այդ երկրում շարժունակ հիվանդանոցների ցանցի ստեղծման ուղղությամբ, որոնցից յուրաքանչյուրն ունենալու է 20 հոգանոց անձնակազմ»։
Հաշվի առնելով Սոմալիում տիրող քաղաքական անկայուն իրավիճակը՝ Էրդողանին ուղեկցելու է Թուրքիայի զինված ուժերի հատուկջոկատայինների խումբը, ինչպես նաև ուժեղացվելու է նրա անձնական թիկնազորը։
Հիշեցնենք, որ Էրդողանը, օրեր առաջ հանդես գալով իր գլխավորած «Արդարություն և զարգացում» կուսակցության (ԱԶԿ) ժողովում, անդրադարձել էր նաև Սոմալիի երաշտին ու սովին։
Իր ելույթում Էրդողանը քննադատության էր ենթարկել այն բոլոր երկրներին ու միջազգային կառույցներին, որոնք անտարբերություն են ցուցաբերում Սոմալիի խնդիրների նկատմամբ. «Աֆրիկայի բնական հարստությունների թալանչիները հանգիստ, առանց խղճի խայթի հետևում են աղետին»։
Ի դեպ, վերջին շրջանում Աֆրիկայի արևելյան շրջաններում շարունակվող երաշտի և դրանով պայմանավորված սովի հետևանքով անցած 90 օրերի ընթացքում զոհվել է մինչև 5 տարեկան 29,000 երեխա: ՄԱԿ-ը Սոմալիի 5 շրջաններ հայտարարել է աղետի գոտի: Ներկայումս Սոմալիում սննդի կարիք ունի մոտ 2.3 միլիոն մարդ:
