ԱՄՆ նախագահ Ջո Բայդենը թալիբների կողմից Աֆղանստանի գրավման և երկրում ստեղծված իրավիճակի ողջ պատասխանատությունը դրել է աֆղանական կառավարության և երկրի անվտանգության ուժերի վրա։
«Աֆղանստանի քաղաքական առաջնորդներին չհաջողվեց իրենց ժողովրդի անունից համախմբվել և բանակցել իրենց ապագայի շուրջ»,-ասել է Բայդենը՝ ելույթ ունենալով Սպիտակ տանը։
Նա նշել է, որ չի ափսոսում Աֆղանստանից ամերիկյան զորքերը դուրս բերելու որոշման համար: Հիշեցրել է, որ ինքը Միացյալ Նահանգների չորրորդ նախագահն է, ով ականատես է եղել ամերիկյան ներկայությանն Աֆղանստանում, և մտադիր չէ այդ պատերազմը փոխանցել հաջորդ նախագահին:
Ըստ Սպիտակ տան ղեկավարի՝ Աֆղանստանում Միացյալ Նահանգների ներկայության նպատակը «երբեք չի եղել ազգ կամ միասնական և կենտրոնացված ժողովրդավարություն կառուցելը»:
ԱՄՆ նախագահի խոսքերով՝ «եթե Աֆղանստանի անվտանգության ուժերը իրենց երկրի համար պայքարելու կամք չդրսևորեն, ամերիկացի զինվորները դա չեն կարող անել և չպետք է անեն»:
Բայդենը նաև ընդգծել է, որ Վաշինգտոնը զգուշացրել է «Թալիբան» շարժմանն ԱՄՆ -ի կայծակնային պատասխանի մասին` տարհանման գործողությանը միջամտելու կամ ամերիկյան բանակի վրա հարձակման դեպքում: