ՄԱԿ-ի Անվտանգության խորհուրդը կոչ է արել Աֆղանստանում անհապաղ դադարեցնել մարտական գործողություններն ու ստեղծել նոր կառավարություն։ Այս մասին ասվում է նիստի արդյունքներով ընդունված ԱԽ հայտարարության մեջ։
«Անվտանգության խորհրդի անդամները բոլոր մարտական գործողությունների անհապաղ դադարեցման և ներառական բանակցությունների ուղիով նոր կառավարության ստեղծման կոչ են արել, որը կլինի միասնական, ներկայացուցչական»,-ասված է հայտարարության մեջ։
Բացի այդ, խորհուրդը կոչ է արել անհապաղ դադարեցնել բռնությունը, վերականգնել անվտանգությունը, քաղաքացիական ու սահմանադրական կարգը։
ԱԽ անդամները հաստատել են Աֆղանստանում ահաբեկչության դեմ պայքարի կարևորությունը՝ ապահովելու համար այն, որ Աֆղանստանի տարածքը չկիրառվի որևէ երկրի վրա հարձակման համար։
Tolo News-ի հաղորդմամբ՝ այսօր մայրաքաղաք Քաբուլի օդանավակայանում ստեղծված քաոսային վիճակի պատճառով 10 զոհ է գրանցվել։