Հայաստանը պատրաստվում է կառուցել դեպի Իրան տանող «Հյուսիս-Հարավ» մայրուղում հարավային հատվածը: Նշվում է, որ սա երկար գործընթաց էւե այս ծրագրի շրջանակներում իրանցիները շահել են մի քանի տենդեր՝ Հայաստան-Վրաստան կամուրջ, Վեդիի ջրամբար և այլն:
Իրանագետ Արմեն Վարդանյանը «Առաջին լրատվական»-ի հետ զրույցում նշեց, որ ծրագիրը նախատեսված է ավարտել 5 տարում. «Սիսիան-Քաջարան հատվածը բավականին բարդ ռելիեֆում է, կարելի է ասել, որ այդ հատվածը ճանապարհի ամենաբարդ հատվածն է. «Կարծում եմ՝ ՀՀ կառավարությունն ամեն ինչ կանի ծրագիրը սահմանված 5 տարում ավարտելու համար»,-ասաց նա:
Անդրադառնալով նրան, որ Նիկոլ Փաշինյանի Իրան այցից հետո նախատեսվում է Իրանի նախագահի պատասխան այցը Հայաստան, իրանագետն ասաց. «Ակնհայտ է, որ երկու երկրների միջև հարաբերությունների զարգացման լավ հեռանկարներ են ստեղծվել: Եվ եթե հաշվի առնենք, որ ԵՄ-ն 2,7 մլրդ եվրո է հատկացնում, այդ թվում Հայաստանի հարավում Հյուսիս-Հարավի կառուցման համար, և եթե հաշվի առնենք, որ Իրանը բանակցություններ է վարում ԱՄՆ-ի հետ պատժամիջոցները չեղարկելու շուրջ, ապա կարելի է ասել, որ առաջիկա տարիներին բարենպաստ պայմաններ են ստեղծվում նաև հայ-իրանական հարաբերությունների բարելավման և զարգացման համար»:
Նա նկատեց, որ Հայաստանը քաղաքական առումով բավական լավ հարաբերություններ ունի Իրանի հետ. «Իրանն, իհարկե, չեզոք դիրքորոշում ունի Արցախի հարցում, բայց դրանից ավելին ակնկալելն էլ միամտություն կլինի:: Ակնկալել, որ Իրանը բացահայտ հայամետ կորդեգրի և կսկսի հակադրվել Ադրբեջանին ու Թուրքիային, դա միամտություն կլինի: Ստեղծված պայմաններում Իրանի չեզոքությունը մեր օգտին է, մանավանդ հաշվի առնենք, որ Ադրբեջանն ամեն ինչ անում է, որ Իրանին հակադրի Հայաստանին: Այս օրերին բավական մեծ աղմուկ է բարձրացել Ադրբեջանում կապված այն բանի հետ, որ Իրանի դեսպանն է այցելել Գեղարքունիքի մարզ, այդ թվում Վերն Շորժայի տեղամաս, և նույնիսկ պետական քարոզչամեքենայի առաջամարտիկ հանդիսացող Haqqin.az-ի մակարդակով շատ սուր քննադատական նյութեր են հրապարակվում Իրանի դեմ»:
Արմեն Վարդանյանը համոզմունք հայտնեց, որ Արցախի հարցում Իրանի կողմից մեզ ուղղված բացահայտ աջակցություն չի լինելու, դա պատրանք է. «Պետք չէ պատրանքների և իլյուզիաների մեջ ընկնել: Կրկնեմ, Իրանի չեզոքությունը մեր օգտին է:Պետք է ասեմ, որ 44-օրյա պատերազմի ժամանակ եղավ մի պահ, երբ Հայաստանը 3 կողմերից շրջափակված էր, և միայն մեկ ուղի էր մնացել՝ Իրանի տարածքով: Իրանով էին Հայաստան գալիս Ռուսաստանի ինքնաթիռները: Դա ևս մեր օգտին էր և Ադրբեջանում շատ լուրջ վայնասուն էր բարձրացել դրա հետ կապված: Իրանի հյուսիսում ադրբեջանաբնակ շրջաններումցույցեր էին անցկացվում: Այնպես որ մենք չպետք է ընկնենք ծայրահեղությունների գիրկը և մտածենք, որ Իրանը պետք է մեր պատճառով դուրս գա Ադրբեջանի դեմ և հակամարտի Ադրբեջանի դեմ: Իրանը ավելի լավ տնտեսական հարաբերություններ ունի Ադրբեջանի հետ, քան Հայաստանի: Կան նաև ընդհանուր շահեր, էթնիկ ադրբեջանցի փոքրամասնության հարցերը կան»,-ընդգծեց իրանագետը:
