Վրացական GHN լրատվական գործակալության փոխանցմամբ՝ Հարավային Օսիան վճռել է 99 տարի ժամկետով տարածքներ հատկացնել ռուսական ներդրումային նախագծերին։
Այս կապակցությամբ Հարավային Օսիայի նախագահ Էդուարդ Կոկոյտին նշել է. «Մենք հուսով ենք ներգրավել հավելյալ ներդրումներ և հանրապետության տնտեսության վերականգնման գործընթացը սկսել ռուս գործարարների հետ համագործակցության միջոցով։ Այդ նպատակով մենք ռուսական կողմին վարձակալությամբ տարածքներ կհանձնենք 99 տարի ժամկետով։
Ես առաջին անգամ եմ հայտնում այդ մասին։ Ցայժմ ես դեռ չէի բարձրաձայնել իմ պլանների մասին, սակայն չեմ կասկածում, որ ինձ կաջակցեն։ Գոյություն ունեցող նախագծի համաձայն՝ ամայի հողատարածքները կտրվեն ռուսական կողմին, որպեսզի նա բնակեցնի դրանք և տնտեսական գործունեություն ծավալի դրանցում՝ դրան զուգահեռ ապահովելով երկրի պաշտպանությունը»։
Հիշեցնենք, որ Էդուարդ Կոկոյտին Հարավային Օսիայի 2-րդ նախագահ է դարձել 2001 թվականի դեկտեմբերի 18-ին։
Ի դեպ, հուլիսի վերջին Կոկոյտին հայտարարել էր, որ Ռուսաստանը մտադիր չէ անեքսիայի ենթարկել Հարավային Օսիան և նրա հետ կարելի է ձևավորել դաշնակցային հարաբերություններ.
«Մենք ստեղծում ենք անկախ պետություն, որի ժողովուրդը մշտապես հիշելու է այն անգնահատելի օգնությունը, որը մեզ ցուցաբերել է Ռուսաստանը։ Անկասկած, մենք ձգտելու ենք նրա հետ ձևավորել դաշնակցային պետություն։ Ռուսաստանը մեզ համար մշտապես եղել, կա և կլինի մեր հիմնական ռազմավարական գործընկերն ու դաշնակիցը»։
