ԱՄՆ-ում բնակչության կեսը լիարժեք պատվաստվել է կորոնավիրուսային վարակի դեմ։ Այս մասին հայտնել է Սպիտակ տան՝ COVID-19-ի վերաբերյալ տվյալների բաժնի տնօրեն Սայրուս Շահփարն իր թվիթերյան էջում։
Նրա խոսքով՝ դա նշանակում է, որ ավելի քան 165 մլն մարդ ստացել է Moderna-ի կամ Pfizer-ի պատվաստանյութի երկու դեղաչափ կամ մեկ դեղաչափով կիրառվող Johnson & Johnson-ի պատվաստանյութ։
Այսպիսով, ԱՄՆ հիվանդությունների վերահսկման և կանխարգելման կենտրոնի տվյալներով՝ հակակորոնավիրուսային պատվաստանյութի առաջին դեղաչափը ստացել է քաղաքացիների 58․4 տոկոսը, կամ 193 764 457 մարդ, երկու դեղաչափերը ստացել է կամ լիարժեք պատվաստվել 50 տոկոսը (165 918 256 մարդ)։
Վերջին մեկ օրում երկրում ի հայտ է բերվել կորոնավիրուսով վարակման 120 173 նոր դեպք, մահացել է 700 մարդ։ Ընդհանուր առմամբ պանդեմիայի մեկնարկից մինչ օրս գրանցվել է հիվանդության 35 530 951 դեպք, մահացել՝ 613 658 մարդ։
Պատվաստումների ամենացածր ցուցանիշներն ունեն Ֆլորիդան, Տեխասը, Միսսուրին, Արկանզասը, Լուիզիանան, Ալաբաման և Միսսիսիպին։ Հենց այդ նահանգներին է բաժին ընկնում վերջին շաբաթվա ընթացքում վարակման նոր դեպքերի և հոսպիտալացումների կեսը։
