Վրաստանի հիվանդությունների վերահսկման և հանրային առողջության ազգային կենտրոնի ղեկավար Ամիրան Գամկրելիձեի խոսքով՝ Վրաստանում կորոնավիրուսից մահացածների 99,7% -ը պատվաստված չի եղել: Այս մասին Գամկղրելիձեն հայտարարել է միջգերատեսչական համակարգող խորհրդի նիստից հետո, հաղորդում է Aliq.ge-ն:
Գամկրելիձեն նշել է, որ պատվաստված անձանց մոտ վիրուսի տարածման մակարդակը ցածր է:
«Ցավոք, օգոստոսի 3-ին ունեցել ենք 34 մահ: Մեկ հիմնական ուղերձը, որը ես կցանկանայի անել. այս տարվա մահերի ընդհանուր թվի վերլուծություն է իրականացվել, և նրանցից 99,7% -ը, ցավոք, պատվաստած չի եղել: Մյուս կողմից, վերլուծվել են նաև պատվաստված բնակչության վարակման դեպքերը, այն է` երկու դեղաչափով պատվաստվածների 0.3% -ը և մեկ դեղաչափով պատվաստվածների 0.9% -ը: Պատվաստված 1000 մարդուց մեկը կարող է մահանալ, մինչդեռ 1000 չպատվաստվածներից մահանում է 15 մարդ»,- ասել է Գամկղրելիձեն՝ հավելելով, որ Վրաստանում ընդհանուր հաշվով պատվաստվել է 523 հազար մարդ, որից 165 հազարը ստացել է ամբողջական չափաբաժինը, ինչը կազմում է չափահաս բնակչության 5,8% -ը:
Վրաստանում կորոնավիրուսի դեմ պատվաստումները սկսվել են մարտի 15 -ին ՝ աստիճանաբար ընդգրկելով բնակչության նոր խմբեր: Հուլիսի 5-ից մեկնարկել է մասսայական պատվաստումը: Միջին հաշվով` երկրում օրական կատարվում է 15-17 հազար ներարկում:
Ներկայումս Pfizer-ով պատվաստումը թույլատրվում է 16 տարեկանից բարձր անձանց: 45 տարեկանից բարձր մարդիկ կարող են ընտրել AstraZeneca, իսկ 18 -ից բարձրերը` Sinopharm կամ Sinovac: