Վերջին շրջանում հաճախ են դեպքերը, երբ նախկին բարձրաստիճան պաշտոնյաների մասնակցությամբ քրեական գործերը, որոնք հասել են դատարաններ առաջ չեն գնում:
Նման գործերից մեկը ՀՀԿ-ական նախկին պատգամավոր Մհեր Սեդրակյանի, կամ որ առավել հայտնի է «Թոխմախի Մհերի» և մյուսների գործով դատական նիստն է:
1in.am-ը «Դատալեքս»-ից տեղեկանում է, որ այս գործով նիստերը նշանակվում են տևական ընդմիջումներով, իսկ նշանակված օրերին էլ չեն կայանում:
Գործը դեռևս հունվար ամսին վարույթ է ընդունվել և մակագրվել է դատավոր Վահագն Մելիքյանին, նա էլ ամեն անգամ տարբեր պատճառներով կողմերին տեղեկացնում է նիստի օրվա փոփոխության մասին:
Արդյունքում ստացվում է, որ հունվար ամսից վարույթ ընդունված քրեական գործը դոփում է նույն տեղում, այսպիսով ենթադրյալ հանցանք կատարած անձանց անպատիժ մնալու հնարավորություն տալով:
Հիշեցնենք, որ ըստ մեղադրական եզրակացության՝ Մհեր Սեդրակյանին մեղադրանք է առաջադրվել այն բանի համար, որ նա, 1999-2008-ին զբաղեցնելով Երևան քաղաքի Էրեբունի համայնքի ղեկավարի պաշտոնը, շահադիտական և անձնական այլ շահագրգռվածությունից ելնելով, 2004-ի ընթացքում համայնքի ավագանու անդամների օժանդակությամբ, չարաշահել է իր պաշտոնեական լիազորությունները, պաշտոնեական դիրքն օգտագործել է ծառայության և Էրեբունի համայնքի շահերին հակառակ։
Քննչական կոմիտեն 2020-ի սեպտեմբերին հայտնել էր, որ Սեդրակյանը, ապօրինի կերպով Երևան քաղաքի Էրեբունի համայնքի սեփականությունը հանդիսացող՝ «Վարդավառ զբոսայգու» տարածքում գտնվող ընդհանուր 12 035.5քմ. հողատարածքը օտարել է որդուն և եղբորը։
Բացի Սեդրակյանից, այս գործով մեղադրանք է առաջադրվել ևս հինգ անձի։
