Ֆրանսիայում իրավապահները 71 հոգու բերման են ենթարկել սանիտարական անցագրերի դեմ շաբաթ օրը տեղի ունեցած բողոքի ցույցերի ժամանակ: Այս մասին հայտնում է LCI հեռուստաալիքը՝ վկայակոչելով ՆԳՆ-ին:
Հաղորդում է նաև, որ բողոքի ցույցերի ընթացքում վիրավորվել է 27 ոստիկան:
Ավելի քան 160 000 մարդ է մասնակցել բողոքի ցույցերին ամբողջ Ֆրանսիայի տարածքում: Մի շարք քաղաքներում գործողություններն ուղեկցվել են անկարգություններով:
Հուլիսի 12-ին Ֆրանսիայի նախագահ Էմանուել Մակրոնը հայտարարել է COVID-19- ի տարածումը զսպելու նոր միջոցառումների մասին: Հուլիսի 21-ից թանգարաններ, թատրոններ, կինոթատրոններ, փառատոներ, ներկայացումներ, զվարճանքի սրահներ այցելելիս սանիտարական անցագրեր են պահանջվում: Բացի դրանից, Ֆրանսիայի հանրապետության ղեկավարը հայտարարել է Ֆրանսիայում բժիշկների և բոլոր նրանց, ովքեր աշխատում են հիվանդանոցներում և ծերանոցներում, պարտադիր պատվաստում անցնելու մասին:
Ֆրանսիայի նախագահի հայտարարություններից հետո պատրաստվել է համապատասխան օրինագիծ, որը սահմանում է նոր սահմանափակող միջոցներ: Ֆրանսիայի Սենատը հավանության է արժանացրել օրինագիծը։
