«Առաջին լրատվական»-ի հարցերին պատասխանել է ԳԽ նախկին պատգամավոր Ազատ Արշակյանը
Արտախորհրդարանական ուժերի հետ Նիկոլ Փաշինյանը պարբերաբար հանդիպումներ է ունենում և տեսակետ կա, որ իշխանությունը պետք է կադրեր ընտրի նաև այդ ուժերից՝ հաշվի առնելով, որ անցած երեք տարիների ընթացքում բազմիցս հենց քննադատության թիրախում է եղել ոչ պրոֆեսիոնալ կադրեր ունենալու համար: Ձեր կարծիքով, իշխանությունն իսկապես դիտարկո՞ւմ է այդպիսի հնարավորություն, և եթե արտախորհրդարանական ուժեր ներգրավվեն, պատկերն այլ կարո՞ղ է լինելու պետական կառավարման համակարգում:
Իհարկե, արտախորհրդարանական ուժերը փաստորեն մի աստիճան սովորական քաղաքացիներից բարձր են որպես ադմինիստրատիվ մտավորականներ, որովհետև նրանք արդեն հայտ ներկայացրել են իշխանական համակարգում ծառայություն կատարելու համար: Քաղաքականությամբ զբաղվող քաղաքացին հենց իշխանությունում լինելու հայտ է ներկայացրել, և բնական է, որ դա այսպես կոչված կադրային ռեզերվն է երկրի: Իհարկե, առաջին հերթին այնտեղից պետք է ընտրություն կատարեն կադրեր նշանակողները: Տվյալ դեպքում Նիկոլ Փաշինյանը որպես վարչապետ: Նա առաջին հերթին հայտ ներկայացրած քաղաքացիներից ձևավորի իր թիմը: Ես ընդհանրապես, կարծում էի, որ առաջին հանդիպման ժամանակ ինքը, մի տեսակ «ժողովրդական վերահսկողություն» իմաստով է շփվելու արտախորհրդարանական ուժերի հետ: Քանի որ ՀՀ-ում շատ թույլ են քաղաքացիական հասարակությունը և հատկապես քաղաքական կուսակցությունները, այսինքն հաշվետվություն պահանջող ուժերը բնականից թույլ են, Նիկոլ փաշինյանը դա հասկացել է, որ իր թիմակիցներին հսկող ու վերահսկող ուժեր չկան, որովհետև անգամ խորհրդարանական անցած ուժերը քաղաքական վերահսկողության գործառույթ իրենց վրա չեն վերցնում, նրանք ուզում են քանդել, հեռացնել ժողովրդավարական իշխանությունը և ժողովրդավարությունը Հայաստանից, րա համար Նիկոլ փաշինյանը, ըստ երևույթին, ուզում է խրախուսել, ուժեղացնել արտախորհրդարանական ուժերին: Ոչ թե նրանց դարձնել իր թիմակիցը, այլ թողնել, որ նրանք աճեն, ուժեղանան ու կատարեն այդ գործառույթը: Ես հույս ունեմ, որ Նիկոլ Փաշինյանը նախորդների նման չի վարվի, և օրենքով ձև կգտնի ուժեղացնելու համար քաղաքական ուժերին, նախևառաջ «Կուսակցությունների մասին» օրենքում փոփոխություններ կատարելով: Դա թույլ կտա փոքր ուժերին միավորվել, ուժանանալ և դառնալ քաղաքական վերահսկիչներ: Ես կարծում եմ, որ այդ երկուսը կարելի է համատեղել. Մի կողմից այդտեղից վերցնել կադրեր, այսինքն նրանց դարձնել յուրային՝ միացնելով ՔՊ-ին, մյուս կողմից նրանց հետ շփվելով, նրանց հետ համագործակցելով, նրանց կդարձնի ավելի համարձակ, ավելի ուժեղ և ավելի տեղեկացված, և նրանք կսկսեն վերահսկող իշխող կուսակցությանը, ինչը խիստ անհրաժեշտ է իշխանությանը: Նիկոլ Փաշինյանն ինքը չպետք է հայտնաբերի իր թիմի մեջ եղած թերություններն ու սխալները:
Իսկ Նիկոլ Փաշինյանը պատրա՞ստ է ոչ յուրայիններին ընդունել իր թիմում:
Քանի որ հիմնականում այդ արտախորհրդարանական ուժերը հայտնի են անհտապես և անձնապես, նրանք սիրով կդառնան յուրային, հենց որ նրանց առաջարկվի համարժեք աշխատանք։ և պաշտոն: Նրանց հիմնական մասը հենց պաշտոն են ուզում իրենց ծրագրերն իրագործելու համար: Այսպիսին է առասպելը՝ ես ծրագիր ունեմ, ինձ տվեք իշխանական լծակներ, պաշտոն տվեք, որպեսզի ես դրանք իրականացնեմ: Քաղաքական կարիերիստներն այդպիսի առասպել ունեն: Ասում են՝ ծրագրեր ունեմ, բայց պաշտոն չունեմ, այ, որ պաշտոն ունենամ, իմ ծրագրերը կիրականացնեմ և Հայաստանը կբարգավաճի:
Հիմա պետք է տրվի՞ այդ հնարավորությունը:
Հիմա Նիկոլ Փաշինյանը նրանցից մի քանիսին կտա այդպիսի հնարավորություն: Այսինքն լծակներ կտա, ռեսուրսներ պաշտոնի միջոցով, և նրանք հաջողությամբ կիրականացնեն իրենց ծրագրերը կամ կձախողվեն: Ձախողման դեպքում էլ չի ասի՝ շնորհակալություն համագործակցության համար, կասի՝ ձախողվեցիր, հիասթափված եմ, դրա համար պաշտոնանկ եմ անում: Դա պետք է հստակ հնչի, ոչ թե ասում է՝ շնորհակալ եմ ծառայության համար, բայց աչքիս չերևաս:
