Իրանի նորընտիր նախագահ Ռայիսին Հայաստանի և Ադրբեջանի նախագահներին տարբեր կերպ է շնորհավորել: Մասնավորապես նա շնորհավորել է ադրբեջանական ժողովրդին «Ադրբեջանի տարածքները հաջողությամբ ազատագրելու, այդ տարածքներում Ադրբեջանի պետական իշխանության վերականգնման և պետական սահմանների վերահսկողության հաստատման կապակցությամբ: Ի՞նչ հարաբերություններ է փորձում Իրանի նորընտիր նախագահը կառուցել թե՛ Հայաստանի, թե ՛ Ադրբեջանի հետ։ Իրանահայ քաղաքական մեկնաբան Սահակ Շահմուրադյանը, անդրադառնալով Ռայիսիի գնահատականներին, «Առաջին լրատվական»-ի հետ զրույցում նշեց, որ ոչ միայն Հայաստանի և Ադրբեջանի, այլ նաև նման շնորհակալական ուղերձ է հղել շատ երկրների առաջնորդներին։
«Ավելին՝ Ադրբեջանի նախագահին հղած ուղերձը բավականին կարճ ու հստակ էր. և այնտեղ Լեռնային Ղարաբաղի հարցի վերաբերյալ կրկնվել էր Ադրբեջանի կողմից Լեռնային Ղարաբաղի հարակից տարածքները Ադրբեջանի կողմից հետ վերցնելու Իրանի հիմնական մոտեցումը՝ ավելի շատ շեշտը դնելով Ադրբեջանի հետ տարբեր ոլորտներում համագործակցությունները շարունակելու և ընդգծելու կարևորության վրա: Այնտեղ արտառոց բան չկար Իրանի մոտեցումների վերաբերյալ: Դա Իրանի արտաքին քաղաքականության հիմնական և պաշտոնական վերաբերմունքի արտահայտությունն էր հարևան Ադրբեջանի պետության և դավանակից ժողովրդի վերաբերյալ»,-ասաց Շահմուրադյանը:
Նրա խոսքով՝ ավելի կարևոր է Իրանի նորընտիր նախագահի ուղերձը Նիկոլ Փաշինյանին, այն ավելի ավելի ջերմ, ավելի մտերիմ և ավելի բովանդակային շեշտադրումներ է պարունակում իր մեջ, քան Ալիևին հղված նամակում:
Ռայիսին նշել է, որ միջազգային և տարածաշրջանային խնդիրների հարցում երկու երկրների նույնատիպ և մոտ դիրքորոշումները, որոնք ուղեկցվել են կառուցողական համագործակցությամբ, մեր հարաբերությունների կարևորության ցուցիչն են: Ընդհանուր մարտահրավերներն անխուսափելի են դարձրել երկու երկրների փոխգործակցության խորացումը՝ հանուն տարածաշրջանում խաղաղության ապահովման և կայունության պահպանման:
Շահմուրադյանի խոսքով՝ հատկանշական է, որ Ալիևին հղված նամակում, ընդհանուր գծերով նա առիթը պատեհ համարելով շնորհավորել Ադրբեջանի ժողովրդին՝ այդ երկրի գրավյալ տարածքների ազատագրման կապակցությամբ և անդրադարձել հարաբերությունների առավել քան երբևէ զարգացման և խորացմանը, հենց այդքան, ինչ նախկինում իրանցի պաշտոնյաներն իրենց հայտարարություններով շեշտել են Ադրբեջանի հարաբերությունների մասին:
Տեսակետ կա, որ նորընտիր նախագահի՝ Ադրբեջանի նախագահին ուղղված ուղերձը հարված է հայկական կողմին։ Իրանի նորընտիր նախագահի ուղերձը Ադրբեջանի նախագահին, Շահմուրադյանի խոսքով, միանգամայն հարված չէ Հայաստանին, այլ սովորական դիվանագիտական պրակտիկա և դա չպետք է ընկալել Իրանի պաշտոնական դիրքորոշումը ընդդեմ Հայաստանի, դա սխալ ընկալում է:
«Ռայիսիի ուղերձում դիտարկումները հատկապես Ադրբեջանի և Լեռնային Ղարաբաղի հետ կապված, կրկնում եմ, Իրանի պետական համակարգում և արտաքին քաղաքականության ընդհանուր մոտեցումների վերահաստատումն է: Իրանի կամ այլ երկրների կողմից Ադրբեջանի նախագահին հղված հայտարարությունները չպետք է գնահատել Հայաստանի ինքնիշխանության դեմ ողված քայլ կամ մոտեցում: Այստեղ այլ հանգամանք է կարևոր․ չնայած Ռուսաստանը համարվում է Հայաստանի վաղեմի բարեկամ, դաշնակից, եղբայր, հովանավորող, աջակցող և որոշ մարդկանց ձևակերպմամբ՝ նաև հայ ժողովրդի «փրկիչ»-ը, սակայն Մոսկվայի մոտեցումը Լեռնային Ղարաբաղի ինքնորոշման հարցի և հատկապես ՌԴ նախագահ Վլադիմիր Պուտինի այն հրապարակային հայտարարությունը, որ Ռուսաստանն Արցախը ճանաչում է որպես Ադրբեջանի Հանրապետության տարածք, հայ հասարակությանն այնքան էլ չգրգռեց, որքան Իրանի պաշտոնյաների կողմից իրենց դավանակից, երկրորդ շիա մեծամասնություն ունեցող երկիր Ադրբեջանի ժողովրդին հղած բարեկամական հայտարարությունները»:
Իրանը, նրա խոսքով, փորձում է տարածաշրջանային հակամարտությունները կարգավորելու և անվտանգությունն ու խաղաղությունը տարածաշրջանում հաստատելու նպատակով համագործակցել տարածաշրջանի բոլոր երկրների հետ: «Իսկ Սյունիքի մարզի սահմանային միջադեպերի ու Ադրբեջանի կողմից Հայաստանի սուվերեն սահմանները խախտելու դեպքերից հետո իրանցի պաշտոնյաների դիտարկումներն ավելի հաճախակի են դարձել Ադրբեջանի իշխանությունների նկատմամբ, անվերջ՝ փորձելով նրանց հիշեցնել,․ որ պետք է հարգեն Հայաստանի Հանրապետության սահմանային անվտանգությունը և միջազգայնորեն ճանաչված պետական սահմանները:Ննման ուղերձ Արցախյան 44-օրյա պատերազմից և դրան հաջորդող պայմանավորվածություններից հետո Իրանի կողմից մինչ այժմ չի ուղղվել Հայաստանի նկատմամբ, ինչը նշանակում է, որ Իրանը ճանաչում է Հայաստանի պետական և միջազգայնորեն ճանաչված սահմանների և ինքնիշխանության փաստացի իրավունքը և փորձում է իր բարեկամական հարաբերություններն առավել խորացնել ու համագործակցություններն ընդլայնել Հայաստանի հետ»,-հավելեց Շահմուրադյանը:
