Եվրոպական խորհրդի նախագահ Շառլ Միշելի գլխավորած պատվիրակությունը այսօր՝ հուլիսի 16-ին երկօրյա այցով կժամանի Հայաստան: Այս մասին նշված է կառավարության էլեկտրոնային հարթակում հրապարակված որոշման մեջ, որով Հայաստանի վարչապետի պաշտոնակատարը հանձնարարել է նախապատրասվել եվրոպացի բարձրաստիճան պաշտոնյայի այցին։
Քաղաքագետ Ռոբերտ Ղևոնդյանի կարծիքով՝ տարածաշրջանում տեղի են ունենում գործընթացներ, որոնք բավականին լուրջ փոխկապակցվածություն ունեն աշխարհաքաղաքական իրադարձությունների հետ․«Պատահական չէ, որ Եվրրոպական միությունը մեծ գումար է հատկացնում Հայաստանին՝ընդ որում աննախադեպ գումար, որը նախկինում երբեք չէր եղել։Եվ Շառլ Միշելի Հայաստան այցելությունը, ապա նաև Մակրոնի՝ Հայաստան կատարելիք հնարավոր այցելությունը ենթադրվում է , որ կապված է այդ գործընթացների, Հայաստանի՝ արտաքին քաղաքականությունում ավելի ակտիվ դերակատարության հավակնությունների հետ»,-«Առաջին լրատվական»-ի հետ զրույցում ասաց նա։
Մեր այն հարցին՝ արդյոք նկատելի է, որ Հայաստանն ունի ակտիվ հավակնություններ արևմտյան ու եվրոպական քաղաքականության հետ կապված, Ղևոնդյանը պատասխանեց․«Ոչ միայն դեպի արևմուտք ու Եվրոպա, ես կարծում եմ, որ Հայաստանը փորձելու է ակտիվ դերակատարություն ունենալ ընդհանուր առմամբ արտաքին քաղաքականությունում՝ոչ թե մեկ ուղղվածությամբ, այլ բոլոր այն ուղղություններով, որոնք կպատասխանեն Հայաստանի շահերին։Դրանք են թե՛ արևմուտքը, թե՛ Եվրոպան, թե՛ Ռուսաստանը և թե՛ Չինաստանը կամ Մերձավոր արևելքը։ Հասկանալի է, որ այդ հետաքրքրությունը բերում է պատասխան արձագանքի․ հակառակ կողմն էլ՝ այս դեպքում Եվրոպական միությունն իր կողմից է քայլեր անում, որոնք փոխադարձ շահեր են շոշափում։ Մեկ-երկու օր առաջ ես մասնակցում էի ՆԱՏՕ-Հայաստան համագործակցության թեմայով Չեխիայի ու Լեհաստանի դեսպանների հետ հանդիպմանը, նրանք ևս նշեցին, որ ՆԱՏՕ-ն բաց է համագործակցության համար, իսկ համագործակցության ուղիների վերաբերյալ առաջարկները պետք է գան Հայաստանից։ Ենթադրում եմ, որ այդպիսի հավականություններ Հայաստանը ցույց է տվել և մենք տեսնում ենք հետևանքները»,-եզրափակեց նա։
Քաղաքագետ Արմեն Վարդանյան ևս մեջբերեց այն հանգամանքը, որ Եվրամիությունը Հայաստանին աննախդեպ՝ մոտ 2․6 միլիարդ դոլարի ֆինանսական օժանդակություն է հատկացնելու առաջիկա 5 տարիների ընթացքում՝ Արևելյան գործընկերության շրջանակներում․ «Սա ցույց է տալիս, որ Եվրամիության համար Հայաստանը դեռևս և՛ արժեք ունի և մեծ գործոն է։ Եվրամիությունը չի պատրաստվում ձեռքերը լվանալ Հայաստանից ու թողնել միայնակ այս ծանրագույն վիճակում։ Այնպես որ՝ Եվրամիությունն էլ Հարավային Կովկասում լուրջ հետաքրքրություններ ունի ու հատկանշական է, որ Հայաստանին տրվելիք ֆինանսական աջակցությունները 10, 20 անգամ ավելի շատ են, քան Ադրբեջանին տրվելիքը»,-«Առաջին լրատվական»-ի հետ զրույցում ասաց նա։
Վարդանյանի խոսքերով՝ Եվրամիությունն էլ շատ լավ հասկանում է, որ այժմ Հայաստանը շատ մեծ կախվածություն ունի Ռուսաստանից ու Հայաստանի առաջ մեջ պահանջներ չի դնում․«Չի դնում նաև երկընտրանքի առաջ։ Միայն այս փուլում մեզանից պահանջում է բարեփոխումներ անել ժողովրդավարության, մարդու իրավունքների զարգացման ու այլ ոլորտներում։ Բարեբախտաբար մեր առջև չեն դնում «կա՛մ կա՛մ»-ի այլընտրանքը։ Բրյուսելում շատ լավ հասկանում են, որ Հայաստանն ունի շատ մեծ կախվածություն ու այս փուլում մեզ ճնշումների չեն ենթարկում»,-եզրափակեց նա։
