Սահմանադրական դատարանը շարունակում է քննել արտահերթ ընտրությունների արդյունքները վիճարկող դիմումները, ՍԴ որոշումը կհրապարակվի հուլիսի 17-ին։ Այսօր կողմերը հանդես կգան եզրափակիչ ելույթներով։ Եզրափակիչ ելույթների համար սահմանվել է առավելագույնը 30 րոպե ժամկետ։
Փաստաբան Գևորգ Գյոզալյանը «Առաջին լրատվական»-ի հետ զրույցում նշեց, որ հուլիսի 17-ին պետք է լինի ՍԴ որոշում, հակառակ դեպքում կլինի օրենքի խախտում, այսինքն՝ ՍԴ-ն 15-օրյա ժամկետի մեջ կաշկանդված է։
Անդրադառնալով այն քննարկումներին, հարց ու պատասխաններին, որ ծավալվում է ՍԴ-ում՝ փաստաբանը ասաց, որ ակնհայտ է, մենք արդարադատություն տեսնում ենք.
«Առնվազն ես չեմ հիշում նման խորքային դատաքննություն։ Այլ հարց է, որ դատաքննության դատավորների հետ կապված ես խորը մտահոգություններ եմ հայտնել, որովհետև դատավորներից երկուսը փորձ արեցին դատարանի հեղինակությունը նսեմացնելու, և մենք դրա հետևանքները կզգանք։ Սա շատ վատ փորձ էր, և ակնահայտորեն մենք տեսնում ենք, որ կան դատավորներ… Ֆեմիդայի աչքերը բաց են, ինձ համար դա մտահոգիչ է, քանի որ դատավորի աչքերը պետք է փակ լինեն, ինչը ես չեմ տեսնում, ինչն ինձ համար մտահոգիչ է»,-ասաց փաստաբանը։
Բուն արդարադատության մասով, ըստ փաստաբանի, ակնհայտորեն խորքային արդարադատություն է իրականացվում, կողմերը լիարժեք իրացնում են իրենց իրավունքները, այսինքն՝ յուրօրինակ գնահատականի կարելի է արժանացնել այն փաստը, որ մենք տեսնում ենք, թե ինչ հիմքերով են նրանք ցանկանում, որ ընտրությունների արդյունքները անվավեր ճանաչվեն։
Թե ինչպիսի որոշում կկայացնի ՍԴ-ն, ապա, Գյուզալյանի դիտարկմամբ, առնվազն մինչ այս պահը այն փաստերը, որոնք ներկայացվել են ՍԴ, բավարար չեն, որ ընտրությունների արդյունքները անվավեր ճանաչվեն։
«Եվ որքանով հասկացել եմ հրապարակային այս դատաքննությունից, հիմնական փաստերը հանգում են նրան, որ բռնության կոչեր են եղել, որ հոգեբանորեն կաշկանդված են եղել ընտրողները բռնության կոչերի իմաստով, վարչական ռեսուրսի օգտագործման փոքր դրվագ կա, բայց ընդհանուր առմամբ չի կարելի համարել, որ ամբողջությամբ ընտրությունները կարելի է անվավեր ճանաչել, այսինքն՝ ես՝ որպես իրավաբան, այս փաստարկները բավականին թույլ եմ գնահատում»։
Արդյոք ընդդիմությունը չի դիմե՞լ զուտ դիմելու համար՝ իմանալով ելքը։ Ըստ փաստաբանի՝գործող վարչապետը ժամանակին շատ էր այդ հարցը բարձրացնում, որ նախկին ընտրություններում որևէ մեկը ՍԴ չդիմեց և դրանով իսկ փորձում էր այդ ընտրությունների արդարությունը ի ցույց դնել, և այստեղ չի բացառվում այդ քաղաքական մասը, և հիմա իրավական փաստաթղթին տրվեց.«Կանցնեն տարիներ, և մենք կնայենք կտեսնենք, թե այս ընտրություններին մենք ինչ հարցեր ենք բարձրացրել»,- ասաց նա։
Լուսանկարը՝ panorama.am-ի
