Ֆրանսիան ողջունում է Ադրբեջանի կողմից ականապատ դաշտերի քարտեզներ տրամադրելու դիմաց 15 հայ գերիների ազատ արձակումը։ Այս մասին ասված է Ֆրանսիայի ԱԳՆ-ի տարածած հաղորդագրության մեջ, փոխանցում է ՏԱՍՍ-ը։
«Ֆրանսիան ողջունում է Ադրբեջանի կողմից գերեվարված 15 հայ քաղաքացիների ազատ արձակումը, ինչպես նաև Հայաստանի կողմից Ֆիզուլիի եւ Զանգելանի շրջաններում ականապատ դաշտերի տրամադրումը”, – նշել են գերատեսչությունում:
ԵԱՀԿ Մինսկի խմբի համանախագահող Ֆրանսիայի կարծիքով ՝ «այդ փոխանակումը, ինչպես և նախորդ՝ հունիսի 11-ին կայացած փոխանակումը, կարևոր քայլ էր լարվածության նվազեցման և կողմերի միջև վստահության վերականգնման գործում»:
«Ֆրանսիան կոչ է անում կատարել 2020 թվականի նոյեմբերի 9-ին կողմերի ստանձնած պարտավորությունները, ներառյալ բովանդակալից երկխոսության վերականգնումը և բոլոր պահվող հայ գերիների ազատ արձակումը», – ընդգծել են նախարարությունում:
«Մինսկի խմբի իր գործընկերների հետ միասին Ֆրանսիան կոչ է անում շարունակել այդ դրական դինամիկան և վերահաստատում է իր պատրաստակամությունը՝ աջակցելու Կովկասում տևական խաղաղությանը»,- նշել են արտաքին քաղաքական գերատեսչությունում:
Հիշեցնենք, որ հուլիսի 3-ին ՀՀ կառավարությունը հայտնել էր, որ ռուսական կողմի միջնորդությամբ Հայաստան են վերադարձել 15 հայ գերիներ։
Հայկական կողմը, որպես բարի կամքի դրսևորում, Ադրբեջանին է փոխանցել Ֆիզուլիի ու Զանգելանի շրջանների ականապատ դաշտերի քարտեզները:
