«Հեղափոխությունից հետո շատ-շատ մարդիկ դեռ գտնվում էին նախկին իշխանությունների ազդեցության տակ։ Բայց այս ընտրություններից հետո պետք է այդ պատկերը փոխվի։ Եթե օրենքի դիկտատուրա պետք է հաստատվի այս երկրում, ապա բոլոր թալանչիները պետք է պատասխան տան։ Եթե Հայաստանում հաստատվելու է օրենքի դիկտատուրա, ապա Վաչագան Ղազարյանն ու իր կինը պետք է պատասխան տան իրենց բոլոր արածների համար»,-«Առաջին լրատվական»-ի հետ զրույցում ասաց Սերժ Սարգսյանի թիկնազորի նախկին պետ Վաչագան Ղազարյանին պատկանող «Յանս» ռեստորանաւյին համալիրի նախկին հաշվապահ Սուսաննա Արիստակեսյանը, ով հեղափոխությունից հետո փորձում է իրավապահ մարմիններին ներկայացնել Ղազարյանի անօրինաիկան գործողությունները, քրեական գործեր են հարուցվում, սակայն այդ գործերը նույն արագությամբ էլ կարճվում են։ Վաչագան Ղազարյանը որոշակի գումար է մուծում՝ իբրև վնասի փոխհատուցում և այդպիսով քրեական գործերը հերթականությամբ կարճվում են։
Ամենաթարմ օրինակը այն գործն էր, երբ տիկին Արիստակեսյանը հաղորդում էր ներկայացրել իրավապահներին և տեղեկացրել, որ պետական պահպանության ծառայության աշխատակիցները տարիներ շարունակ սպասարկել են Վաչագան Ղազարյանին ու նրա կնոջը՝ Ռուզաննա Բեգլարյանին։ Նրանք վարորդ են աշխատել այդ անձանց համար, ինչպես նաև ապօրինաբար իրականացրել են «Յանս» ռեստորանային համալիրի պահպանությունը։ Այդ գործն էլ, սակայն, մեծ արագությամբ կարճվեց։ «Իրենք քննչական մարմիններին կաշառելով, նրանց վրա ազդելով իրենց վերաբերյալ բոլոր քրեական գործերը կարճել են տվել, կարողացել են խուսափել պատասխանատվությունից, բայց ես դեռ լիահույս եմ, որ նրանք պետք է պատասխան տան»,-ասաց Սուսաննա Արիստակեսյանը։
Բացի դա, հիշեցնենք, որ «Յանս» ակումբի տնօրեն Սերգեյ Կարապետյանը 2017 թ. հաղորդում էր ներկայացրել ակումբի գլխավոր հաշվապահ Սուսաննա Արիստակեսյանի դեմ՝ պնդելով, թե վերջինս ակումբից հափշտակել է 25 միլիոն դրամ: Դեպքի առթիվ հարուցված քրգործով Արիստակեսյանին մեղադրանք էր առաջադրվել ՀՀ ՔՕ 179 հոդվածի 3-րդ մասով`առանձնապես խոշոր չափի յուրացման համար: Մեկ տարի անց՝ 2018 թ. հեղափոխությունից հետո, հաղորդում էր ներկայացրել նաև Արիստակեսյանը՝ հայտարարելով, որ նույն Սերգեյ Կարապետյանը, Վաչագան Ղազարյանն ու նրա կինը իրենից գումար են շորթել: Ընդ որում, Արիստակեսյանը նշել էր, որ իրենից պահանջել են այդ ենթադրյալ վնասից շատ ավելին՝ 40 միլիոն դրամ, ինչն ինքը վճարել է՝ սպառնալիքների ներքո: Հետագայում ՀՔԾ-ն Սերժ Սարգսյանի թիկնազորի նախկին պետ Վաչագան Ղազարյանի կողմից շորթում կատարելու դեպքի առթիվ հարուցված քրեական գործը կարճեց։ Մինչդեռ Սուսաննա Արիստակեսյանը մեզ հետ զրույցում ասել էր, որ բոլոր բավարար հիմքերը կային հենց այդ դրվագով Վաչագան Ղազարյանին ու նրա կնոջը պատասխանատվության ենթարկելու համար։ Նրանք իրենից շորթել են 40 միլիոն դրամ ու դա ապացուցվում է տարբեր ապացույցներով, այդ թվում՝ Վաչագան Ղազարյանի բնակարանում իրականացված խուզարկության ժամանակ է 40 միլիոն դրամի ստացականը հայտնաբերվել։ Սուսաննա Արիստակեսյանը մեզ պատմել է, որ Սերժի Վաչոյի Կինը իրեն սպառնացել է՝ կամ կվճարի 40 միլիոն դրամը, կամ «կդառնա բոմժ և կընկնի Ռուսաստանի քուչեքը»։ Եվ իրենք հասել էին իրենց նպատակին։ Կինը վաճառել էր իր բնակարանը և որպես փրկագին տվել նրանց, բայց նրանք չէին բավարարվել այդքանով, քրեական հետապնդում էին սկսել կնոջ նկատմամբ։ Այս գործով քննությունը ևս վերջերս կարճվել էր։ Տիկին Արիստակեսյանը բողոքարկել էր քննիչի և դատախազի որոշումը։ Առաջին ատյանի դատարանը՝ ի դեմս դատավոր Դավիթ Բալայանի, բավարարել էր կնոջ հայցապահանջը՝ պարտավորեցնելով վերսկսել գործի քննությունը։
Սուսաննա Արիստակեսյանն այսօր մեզ հետ զրույցում ասաց, որ պատասխանող կողմը բողոքարկել է դատարանի որոշումը, սակայն վերաքննիչ դատարանը՝ ի դեմս Արմեն Դանիելյանի՝ առաջին ատյանի դատարանի որոշումն անփոփոխ է թողել.«Ես շատ ուրախ եմ, որ Հայաստանում կան դատավորներ, որոնք չեն գտնվում տարբեր թալանչիների ազդեցության տակ և կարողանում են օբյեկտիվ գործը քննել ու որոշում կայացնել։ Հիմա երկու ատյանում հօգուտ մեզ որոշում է եղել։ Վերաքննիչում Արմեն Դանիելյանը ևս քննելով նրանց բողոքը այդպես էլ չբավարարեց նրանց պահանջը։ Հիմա մենք սպասում ենք նրանց հաջորդ գործողություններին։ Եթե նրանք նորից չբողոքարկեն, ապա գործի քննությունը կվերսկսի։ Ես լիահույս եմ»,-ասաց Արիստակեսյանը՝ հավելելով.«Իմ կարծիքով այս ընտրություններից հետո դատավորները, դատախազները, քննիչները կվերանայեն իրենց մոտեցումները և այլևս չեն աջակցի թալանչիներին ու վերջապես Վաչագան Խազարյանը, նրա տիկինը, իրենց տնօրենը պատասխան կտան օրենքի առաջ իրենց բոլոր գործողութունների համար։ Պարզապես պետք է, որ երկրի ղեկավարը կոշտ դիրքորոշում դրսևորի և այդ պողպատե մանդատ ասվածը, օրենքի դիկտատուրան չլինի զուտ նախընտրական շրջանում օդի մեջ ասված արտահայտություն։ Մեր իրականությունը պետք է փոխվի։ Քննչական մարմիններն առ այսօր վախենում են Վաչագան Ղազարյանից։ Ոչ նրա հաշիվների վրա կալանք են դնում, ոչ իմ վճարած 40 միլիոնը դեպոզիտսցնում։ Քննչական համակարգում դեռևս կան անձինք, քննիչներ, դատախազներ, որոնք սպասարկում են Սերժի Վաչոյի շահերը, բայց դրան պետք է վերջ տրվի։ Օրենքի դիկտատուրա ասվածը լավագույնս կդրսևորվի իմ այս գործով։ Եթե Վաչագան Ղազարյանը շարունակեց ջրից չոր դուրս գալ, քրեական գործերը շարունակեցին կարճվել, ապա ոչ մի օրենքի դիկտատուրա էլ չկա։ Ես շատ հետևողական եմ լինելու և լիահույս եմ, որ վերջապես մեր երկրում, դատաիրավական համակարգում վերջապես իրավիճակ կփոխվի»,-եզրափակեց Սուսաննա Արիստակեսյանը։
Լուսանկարը՝ Aravot.am-ի
