Արցախի վերջին պատերազմից հետո շատ է խոսվել այն մասին, որ Հայաստանը պետք է ամբողջությամբ վերանայի իր արտաքին քաղաքականությունը, բայց ցավալիորեն պետք է արձանագրել, որ պատերազմից հետո, չնայած այս ոոլորտում ահռելի անելիքներին, արտաքին քաղաքական օրակարգն ամբողջությամբ մղվել է երկրորդ պլան, ավելի քան մեկ ամիս է անոմալ իրավիճակ է տիրում, երբ «բացակայում է» արտգործնախարարությունը: Ինչ անելիքներ, առաջնահերթություններ ունենք, ինչ պետք է անենք արտաքին աշխարհի հետ նորովի հարաբերվելու համար: Այս և տարածաշրջանային կարևորության մի շարք հարցեր «Առաջին լրատվական»-ը քննարկել է միջազգայնագետ, Լոնդոնի Տնտեսագիտության և քաղաքական գիտությունների համալսարանի շրջանավարտ Տարոն Պիպոյանի հետ:
«Արտաքին քաղաքականությունում նախ պետք է ունենանք հմուտ դիվանագետներ, որոնք կարող են Հայաստանի շահերը ճիշտ ներկայացնել և հետամուտ լինել այդ շահերին: Կարծում եմ, որ պետք է վարել պրագմատիկ քաղաքականություն, անելիքները շատ են, բայց պետք է սկսել հենց մեր տարածաշրջանից՝ միևնույն ժամանակ ներգարվելով արևմտյան ուժերին՝ ԱՄՆ, Եվրամիություն… բայց այս գործընթացը կախված չէ միայն մեզանից»,-փաստեց Պիպոյանը:
Մեր զրուցակիցը, անդրադառնալով Ադրբեջանում Իրանի դեսպան Սեյեդ Աբբաս Մուսավիի հայտարարությանն այն մասին, որ Իրանը կողմ է ցանկացած միջանցքի շահագործմանը, ցանկացած երթուղով` առանց պետությունների սահմանները փոփոխելու նշեց, որ Իրանի արտաքին քաղաքականությունը ոչ թե փոխվել է, այլ Թեհրանը նախկին ներուժը չունի: Ներկայում Իրանը լուրջ խնդիրներ ունի՝ միջուկային համաձայնագրի վերաբերյալ բանակցություններ, բացի այդ Թեհրանն ավելի է կարևորում Մերձավոր Արևելքը: «Այս հայտարարությունով և դիրքորոշմամբ Իրանը ցանկանում է կայունություն ունենալ Հարավային Կովկասում, միևնույն ժամանակ այս երկիրը կարող է անցնել լուրջ գործողությունների, եթե Թուրքիան և Ադրբեջանը ռազմավաական սխալներ թույլ տան»:
Առավել մանրամասն՝ տեսանյութում:
