Ազգային ժողովի արտահերթ ընտրություններում Գյումրիի շատ տեղամասերում ընտրողների ակտիվություն է նկատվում:
«Արմենպրես»-ի թղթակիցն առավոտյան արդեն մի քանի ընտրատեղամասերում ականատես եղավ ընտրողների ակտիվ հոսքի:
Գյումրու թիվ 30 դպրոցում տեղակայված թիվ 31/32 տեղամասի հանձնաժողովի նախագահ Տիգրան Մխիթարյանը, ով նախկինում ևս մասնակցել է ընտրական գործընթացներին, վստահեցրեց՝ նման ակտիվություն չէր սպասում: «Տեղամասն ունի 1 754 ընտրող, 8:00 -ին արդեն 8 ընտրող պատրաստ էր իր ընտրությունը կատարելու: Հույս ունեմ, որ ավելի ակտիվ կլինի օրվա ընթացքում, և ամեն ինչ նորմալ կընթանա»,- նշեց Տիգրան Մխիթարյանը: Ընտրական գործընթացում, ինչպես այս տեղամասում, այնպես էլ մի քանի այլ տեղամասերում, հիմնական դժգոհությունը կապված է դիմակներ կրելու պարտադրանքի հետ: Շատ տարեցներ էլ դժվարանում էին իրենց նախընտրած կուսակցության կամ դաշինքի ընտրաթերթիկի ընտրության հարցում:
Թիվ 31/29 տեղամասում ևս մինչ 10:00 ամեն ինչ նորմալ էր՝ բողոքներ ու դժգոհություններ չեն գրանցվել՝ տեղեկացրեց հանձաժողովի նախագահ Սամվել Ոսկանյանը:
Ընտրատեղամասերում գործընթացին հետևում էին տեղական դիտորդներ և վստահված անձիք: Նրանց կողմից ևս դեռ դիտարկումներ ու նկատողություններ չեն գրանցվել:
