Ռուսաստանի արտգործնախարար Սերգեյ Լավրովը և ԵԱՀԿ գլխավոր քարտուղար Հելգա Շմիդտը Մոսկվայում կքննարկեն Լեռնային Ղարաբաղի շուրջ ստեղծված իրավիճակը: Այս մասին հայտնել է ՌԴ ԱԳՆ պաշտոնական ներկայացուցիչ Մարիա Զախարովան:
ԵԱՀԿ գլխավոր քարտուղարը հունիսի 21-ին Մոսկվայում մասնակցելու է միջազգային անվտանգության 9-րդ համաժողովին:
«Կողմերը մտքեր կփոխանակեն Մերձդնեստրի, Լեռնային Ղարաբաղի խնդրի կարգավորման գործընթացում առկա իրավիճակի և Անդրկովկասում կայունության վերաբերյալ ժնևյան քննարկումների շուրջ», – ասել է Զախարովան:
Հելսինկյան նախաձեռնություն-92 Լեռնային Ղարաբաղի կոմիտեի համակարգող, խաղաղության և մարդու իրավունքների միջազգային մրցանակների դափնեկիր Կարեն Օհանջանյանի կարծիքով՝ ղարաբաղյան խնդրի վերջնական լուծումը ԵԱՀԿ-ի լիազորությունն է, մասնավորապես, դրանով պետք է զբաղվի ԵԱՀԿ Մինսկի խումբը․<Պատերազմը կասեցրած երեք առաջնորդների հայտարարությունը հակամարտությունը կարգավորող միջազգային իրավական փաստաթուղթ չէ: Սա լավ հասկանում են ինչպես Մոսկվայում, այնպես էլ Անկարայում և Բաքվում: Հետևաբար, վերջին շրջանում ակտիվացել են միջազգային կառույցները ՝ Լեռնային Ղարաբաղի Հանրապետության վերջնական կարգավիճակի լուծման համար»,-«Առաջին լրատվական»-ի զրույցում ասաց նա։
Արևմուտքի ակտիվությունն այս հարցում, մեր զրուցակցի խոսքերով, ընդհանուր առմամբ դրական է, բայց ոչ շատ ակտիվ․«Արևմտյան համանախագահները մինչ այժմ ենթարկվել են շանտաժի Ռուսաստանի և Թուրքիայի կողմից, և, հետևաբար, այնքան էլ հետևողական չեն Ռուսաստանի և Թուրքիայի վրա ճնշում գործադրելու հարցում ՝ ստիպելով նրանց սկսել անմիջապես քննարկել կարգավիճակի հարցը, ինչպես նաև այլ նյութատեխնիկական և հումանիտար հարցեր: Դրանց թվում են՝ են միջազգային խաղաղապահ ուժերի տեղակայումը հակամարտության գոտում և ռազմագերիների, պատանդների խնդիրների լուծումը, ինչպես նաև փախստականների և ներքին տեղահանված անձանց հետ կապված խնդիրները»։