Շիրինյան-Բաբաջանյան ժողովրդավարների դաշինքը հանդես է եկել հայտարարությամբ, որում ասվում է.
Հայ-ադրբեջանական սահմանագոտում ահագնացող լարվածության վերաբերյալ պաշտոնական Երեւանի դիրքորոշումն, արտահայտված ՀՀ վարչապետի պաշտոնակատար Ն․Փաշինյանի ելույթում ս․թ․մայիսի 27-ի Անվտանգության խորհրդի ընդլայնված նիստին, որով առաջարկվում է հայելային եղանակով Հայաստանի եւ Ադրբեջանի զորքերը Սոտք-Խոզնավար հատվածում հետ քաշել սահմանից ելման դիրքեր, իսկ դրա փոխարեն ենթադրվող սահմանագծի երկայնքով տեղակայվեն միջազգային դիտորդներ՝ Ռուսաստանը կամ ԵԱՀԿ Մինսկի խմբի համանախագահությունը ներկայացնող, ճանապարհ է հարթում դեպի լարվածության իրական թուլացում եւ լիցքաթափում։
Արձանագրում ենք նաեւ, որ առաջարկությունը հնարավորություն է ստեղծում բալանսավորելու միջնորդական ջանքերն, ուղղված տարածաշրջանային անվտանգության եւ խաղաղության ապահովմանը, պայմաններ ստեղծում ԵԱՀԿ Մինսկի Խմբի եռանախագահության հովանու ներքո եւ միջնորդությամբ բանակցային գործընթացը շուտափույթ վերսկսելու համար, ինչն, ըստ էության, ժամեր անց հավանության արժանացավ երեք համանախագահներից երկուսի կողմից։
Ողջունում ենք մեր պետության օրինական եւ իրական շահերից բխող՝ պաշտոնական Երեւանի առաջարկին համահունչ եւ համընթաց դիրքորոշումներն, արտահայտված Ֆրանսիայի ԱԳՆ եւ ԱՄՆ Պետդեպարտամենտի կողմից տարածված պաշտոնական հայտարարություններում, ինչպես նաեւ՝ ՀՀ ԱԽ նիստում հրապարակված որոշումն առ այն, որ Հայաստանը մտադիր է ակտիվ խորհրդակցություններ սկսել մեր միջազգային գործընկերների հետ, ինչը երկարատեւ եւ արժանապատիվ լուծումներ կարող է ապահովել։
Այս վճռորոշ պահին կոչ ենք անում ՀՀ հանրությանը եւ պատասխանատու քաղաքական ուժերին համախմբվել պետության շուրջ, դրսեւորել պետական մտածողություն, թույլ չտալով Հայաստանի ինքնիշխանության եւ ժողովրդավարության հակառակորդ շրջանակներին սահմանային լարվածությունը տեղափոխել երկրի ներս։
ՇԻՐԻՐՆՅԱՆ-ԲԱԲԱՋԱՆՅԱՆ ԺՈՂՈՎՐԴԱՎԱՐՆԵՐԻ ԴԱՇԻՆՔ
