Սոցիոլոգ Ահարոն Ադիբեկյանը այսօր լրագրողների հետ հանդիպման ժամանակ հայտնեց, թե Հայաստանի 4 բնակավայրերում անցկացված սոցիալոգիական հարցումը ցույց է տվել, որ հասարակությունը կողմ չէ արտահերթ ընտրությունների անցկացմանը։ «18.7%-ը կողմ է արտահերթ ընտրություններին, 41%-ը դեմ է տարբեր պատճառներով. ասում են, թե դրանով ոչինչ չի փոխվի, արտահերթ ընտրությունները անիմաստ են, և այլն, և մոտ 40%-ը դեռ կողմնորոշված չէ»,- ասում է Ահարոն Ադիբեկյանը և ամփոփելով՝ հավելում, թե հանրաքվե անցկացնելու դեպքում արտահերթ ընտրություններին բնակչության մեծ մասը դեմ կլինի։
Այնուհանդերձ, արտահերթ ընտրությունները, ըստ Ադիբեկյանի, ավելի ձեռնտու են ՀՀԿ-ին, քան ՀԱԿ-ին։ «ՀԱԿ-ը տեսնում է, որ կորցնում է արմատական ընդդիմությանը և փորձում է ներկայացնել ողջ ընդդիմադիր դաշտը՝ այսպիսով ձեռնոց նետելով ոչ միայն ՀՀԿ-ին, ԲՀԿ-ին և ՕԵԿ-ին, այլև ՀՅԴ-ին ու «Ժառանգությանը»,- ասում է Ադիբեկյանը։
Սոցիոլոգը իրեն նաև իրավունք է վերապահում քննադատել ՀԱԿ-ի կեցվածքը։ «Ժողովրդի անունից կարող է խոսել միայն լեգետիմ նախագահը, կառավարությունը, այլ ոչ թե մի կուսակցություն։ Ժողովրդի անունից խոսողը կամ տգետ է, կամ մանկամիտ»,- ասում է Ահարոն Ադիբեկյանը։
«ՀԱԿ-ը ռեսուրս չունի իշխանությանը վերջնագիր ներկայացնելու համար։ Եթե ՀԱԿ-ը արդյունքի չհասնի, պետք է դուրս գա քաղաքական դաշտից»,- կարծում է Ահարոն Ադիբեկյանը։
