Եվրոպական ինտեգրումն արագացնելու, նաև տարածաշրջանի անվտանգության պահպանման նպատակով ԽՍՀՄ նախկին երեք պետությունները պայմանավորվել են համատեղ գործողությունների մասին:
Ուկրաինան, Վրաստանը և Մոլդովան ստեղծել են ասոցացված եռյակի ձևաչափ՝ ԵՄ-ին անդամակցելու ուղղությամբ համագործակցության ընդլայնման համար: Երեք երկրների ներկայացուցիչները համապատասխան փաստաթուղթը ստորագրել են Կիևում: Այս մասին Վրաստանի և Մոլդովայի արտգործնախարարների հետ համատեղ ճեպազրույցում ասել է Ուկրաինայի արտգործնախարար Դմիտրի Կուլեբան:
«Մենք ստորագրեցինք մի փաստաթուղթ (փոխըմբռնման հուշագիր. – խմբ.), որով ստեղծվում է «Ասոցացված եռյակը»: Սա եվրոպական ինտեգրման ուղղությամբ մեր երեք պետությունների միջև ընդլայնված համագործակցության ձևաչափ է»,-ասել է նա:
Ասոցացված եռյակը ներառում է երեք հիմնական տարր. արտաքին գործերի նախարարությունների միջև եվրոպական ինտեգրման վերաբերյալ խորհրդատվությունների կառուցվածք, ԵՄ ինստիտուտների և անդամ երկրների հետ երկխոսության մեջ համատեղ դիվանագիտական նախաձեռնություններ և «Արևելյան գործընկերության» ձևաչափի շրջանակներում դիրքորոշումների համակարգում:
