Ֆրանսիացի գործող զինվորականներն աջակցություն են հայտնել երկրի իշխանություններին ուղղված պաշտոնաթող գեներալների բաց նամակին։ ТАСС գործակալության փոխանցմամբ՝ զինվորականների ուղերձը հրապարակել է ֆրանսիական Valeurs actuelles շաբաթաթերթը։
Նամակի հեղինակները, որոնց անունները չեն նշվում, դատապարտում են Ֆրանսիայի իշխանությունների արձագանքը թոշակառու գեներալների կոչին, որոնք հայտարարել էին երկրում քաղաքացիական պատերազմի ռիսկի մասին՝ կապված իսլամիստների և արվարձանների ավազակախմբերի կողմից սպառնացող վտանգի հետ։
«Նրանց վերաբերվեցին որպես ապստամբների, երբ նրանց միակ մեղքը սերն է դեպի իրենց երկիրը։ Մենք տեսնում ենք բռնություն մեր քաղաքներում և գյուղերում… Մենք տեսնում ենք, որ Ֆրանսիայի և նրա պատմության հանդեպ ատելությունը դառնում է սովորական երևույթ» – ասվում է ուղերձում։
Զինվորականների կարծիքով՝ «Ֆրանսիայում քաղաքացիական պատերազմ է հասունանում»:
Պահեստային 20 գեներալների կողմից ստորագրված առաջին հավաքական կոչը՝ ուղղված երկրի նախագահ Էմանուել Մակրոնին, նույնպես հրապարակվել էր Valeurs actuelles-ի կողմից, ապրիլին: Հեղինակները նշել էին, որ ցանկանում են «պաշտպանել հայրենասիրությունը»՝ «հակագաղութային հռետորաբանության» տարածման ֆոնին, որը, ըստ նրանց, Ֆրանսիայի «ավանդույթները, մշակույթը և պատմությունը քայքայելու» վտանգներ է պարունակում:
Նամակում խոսվել է նաև քաղաքացիական պատերազմի սպառնալիքի մասին, որի պատճառ կարող է դառնալ հասարակության մեջ լարվածության և պառակտումների աճը։ Ըստ նամակի՝ Ֆրանսիայում այնպիսի տարածքներ են ի հայտ եկել, «որտեղ հանրապետության օրենքները չեն գործում»:
Ֆրանսիայի զինված ուժերի շտաբի պետ, գեներալ Ֆրանսուա Լեկուենտրը Le Parisien թերթին տված հարցազրույցում բաց նամակի հեղինակներին սպառնացել է պատժամիջոցներով:
