Հադրութից տեղահանված բնակիչները շարունակում են բողոքի ակցիաներ իրականացնել Հայաստանում տարբեր դեսպանատների մոտ։ Երեկ Ռուսաստանի արտաքին գործերի նախարար Սերգեյ Լավրովի՝ Հայաստան կատարելիք այցին ընդառաջ նրանք ակցիա են իրականացրել ԱԳ նախարարության շենքի մոտ՝ պահանջելով, որ վերադարձվեն Հադրութն ու Արցախի մյուս բնակավայրերը։ Նրանք պնդում են, որ Հադրութը, Քաշաթաղը, Քարվաճառը պետք է վերականգնվեն, հայության անվտանգությունը պետք է ապահովվի, առանց Ղարաբաղի Հայաստանի անվտանգություն չկա։
«Առաջին լրատվական»-ի հետ զրույցում «Հանուն Հադրութի» ՀԿ նախաձեռնող խմբի անդամ Լևոն Հայրյանը նշեց, որ հադրութցիների ակնկալիքները շատ մեծ չեն, որովհետև ո՛չ Հայաստանի իշխանությունների և ո՛չ էլ Արցախի իշխանությունների պահվածքը այդ հարցում անհասկանալի է։
Առաջին հերթին, նրա խոսքով, պետք է Արցախի կարգավիճակի մասին մտածել, մինչդեռ այս ուղղությամբ քայլեր չեն իրականացվում։ Հայրյանի համար տարօրինակ է այն, որ Ֆրանսիայի խորհրդարանը բանաձև է ընդունում, որ 94 թվականի սահմաններով Ղարաբաղը ճանաչելու է, Ղարաբաղի իշխանություններն էլ հայտարարում են, որ ամեն ինչ անելու են ԼՂԻՄ-ը վերականգնելու համար, ԼՂԻՄ-ը, սակայն, Հայրյանի խոսքով, մեր անվտանգությունը չէր ապահովում։
«Ռուսն ասում է, Արցախը Ադրբեջան է, Հայաստանն էլ պատասխան չի տալիս։ Մեզ հետ զրույցում Հայրյանը նշեց, որ այսօր թե՛ Հայաստանի, թե՛ Արցախի իշխանությունները փորձում են հաճոյանալ Ռուսաստանին։ Դրա համար անկնալիքները մեծ չեն, թափանցիկ չէ այս գործընթացը, քայլերը բավարար չեն»,-հավելեց նա։
Անդրադառնալով Լավրովի այցից սպասելիքներին, Լևոն Հայրյանը նշեց, որ առհասարակ ռուսական կողմից որևէ դրական սպասելիք չկա․
«Ռուսներից ակնկալիք չունենք, որովհետև ռուսներն արդեն 200 տարի թուրքերի հետ միացած գործողոթյուններ են իրականացնում և երբեք հայամետ քաղաքականություն հայերի նկատմամբ չեն ցուցաբերել, ավելին՝ նույնիսկ թշնամական դիրք են որդեգրել մեր հանդեպ, եթե փոխի մի բան նրանց վերաբերմունքում, դա պետք է լինի արևմտյան պետությունների ճնշման տակ։ Դեռս 19-րդ դարից սկսած ՌԴ-ն Հայաստանից որ տարածքից դուրս էր գալիս, հայերին մաքրելով գալիս էր։ Ընդ որում՝ այն բնական արեալը, որ մեզ պետք էր զարգանալու համար, արդեն չի մնացել, և եթե մենք Արցախի տարածքային ամբողջականությունը չվերանգնենք, մենք ապրելու և շունչ քաշելու տեղ չենք ունենալու»,-ասաց նա։
Հայրյանը նկատեց, որ Հայաստանի և Արցախի իշխանությունները միշտ եղել է ռուսական ճնշման տակ և քայլեր չեն արել ազատվելու դրանից․ «Հետաքրքիր է, որ նաև մեր փորձագիտական շրջանակները ոչ միայն չեն փորձում ռուսական ազդեցությունից ազատվել, ոչ միայն չեն մեղադրում Ռուսաստանին ոչ հայանպաստ դիրքորոշման համար, այլ ծիծաղելի բացատրություններ են բերում Ռուսաստանին արդարացնելու համար»,-ասաց նա։
Հայրյանի խոսքով՝ շատ վատ վիճակում ենք, մենք փրկությունը արևմտյան պետության մանդատի տակ պետք է լինի, ռուսները Հայաստանում պսևդոէլիտա են ստեղծել, որը ավելի շատ է կեղեքում հայ ժողովրդին՝ անընդհատ սպասարկելով ռուսական շահը։
Լուսանկարը՝ panorama.am-ի
